Nongstoiñ, Jylliew, 20: Kan long lehse ka khana sah kynmaw ha ka history jong ki paidbah ka thaiñ Maweit, kata hadien palat 50 tylli ki snem ba ki la mad ïa ka jingeh namar ka jingshah iehbeiñ ha ki bor sorkar bad nongmihkhmat, hynrei mynta ka kynti pat ka tnad PWD ka la mang tyngka haduh 98 klur tam lyngba na ka World Bank, na ka bynta ban shna ïa ka surok shi laiñ shiteng (Intermediate Lane) ba 23 Kilometer na Nongstoiñ haduh jan Maweit.
Halor ka jingshna ïa kane ka surok ba kam poi haduh Maweit, kiba bun ki paidbah na ka thaiñ Maweit kiba la pynpaw ka jingkmen, hynrei bun ruh ki pynpaw ka jingsngew sammut. Uwei na ki riew rangbah u bym kwah pynpaw kyrteng ïalade, haba ïakren bad u nongthoh khubor u la ong kane ka dei tang ka surok kit kyiad, namar ka jaka ban pynkut ïa ka jingshna surok, ka dei ka Mawdom ka shnong ba don dukan kyiad lane wine store.
Na Mawdom haduh Maweit ka dang jngai sa 12 kilometer, kaba mut kat na iew Nongstoiñ sharum ki thaiñ Mawliehbah. U la ong ba ym dei ba kane ka surok kan dang pynshitom jingmut ïa ki paidbah ha ka leit ka wan, hynrei kan pynshitom jingmut ruh ïa ki ban dang shaniah ïa ki bor ka sorkar Jylla.
Lah ban pynkynmaw ba u Conrad Sangka Myntri rangbah ka Jylla u la kren shai hapoh Assembly ban pynpoi lane shna ïa kane ka surok haduh Maweit. Hynrei, ka jingkylla ka long balei la mang tang 23 kilometer. Hato ka sorkar hapoh ka jingïalam jong u, ka shu kular kai kren ban pynbiej ïa ki paidbah. Lada kam pat sngew kot bor lane ym lah ban leh ïa kaba kular, ka bha ban ym dei ban kren Intermediate Lane, hynrei shu ong ban shu pyrshang siang rong noh malu mala.
Ki tyllong khubor ki ïathuh ruh ba ïa kane ka surok lah ban ym shna lai inshi ka jingrben kumba leh ïa ka surok Nongstoiñ Urkali. Hynrei, tang ar inshi ei ei bad lada ka long ha kata ka rukom, te imat tang shi snem ruh kam shan ka surok nalor ba ki trok ruh kin sa bun tang da ki 12 taïar shaneng.
Haba ïakren pat bad u Bah Gigur Myrthong MLA ka thaiñ Mawshynrut, u la pynthikna ba la dep ban khot tender ban shna noh ïa kane ka surok na ka bynta 23 kilometer, ha ka mang tyngka ba 98 klur tam lyngba ka World Bank.
U la ong ba hooid wat lada ym ïoh lut haduh Maweit ruh, hynrei kane kan ïarap ïa ki paidbah ba ïaid ba ieng bad kan pynkmen ruh ïa u kum u nongmihkhmat, namar la ïoh ban pynurlong ïa ka jingangnud jong ki paidbah.
U la ong ruh ba un nang ïai buddien shuh shuh ban pynstet na ka bynta ban pyntrei noh ïa kane ka surok bad u khmih lynti ba la kumno kumno dei ban sdang ïa ka jingtrei hapoh mynta u snem.
U la ai khublei ruh ïa u Myntri Rangbah bad Symbud Myntri Rangbah ka sorkar jylla, kiba la shah skhor ïa ka jingkyrpad jong u, na ka bynta ban pynïoh surok ïa ki paidbah hapoh ka thaiñ Maweit kiba la mad ïa ka kordit khait, namar ka jingbym don ka surok ba biang.
