Ha ka work order la thoh shai bym dei ban pynïeng khyrdop ha ki surok bah : DC

Nongpoh, Jymmang 21: U Deputy Commissioner ka Ri-Bhoi District u Abhilash Baranwal mynta ka sngi u la pynshai paidbah ha kaba ïadei bad ka jingkynnoh jong ki EM ka KHADC ba kynthup ïa u Bah Powell Sohkhlet bad u Bah Winston Tony Lyngdoh ba ka bor district kam shym la burom ïa ka District Council ban leit khang tala ïa ka khyrdop khrong khajna ba dang shu pynieng harud surok bah National Highway ha Umdihar.
Haba kren sha ki lad pathai khubor u Abhilash Baranwal u la ong ba wat haka work order jong ka KHADC bala ai sha u Bah Pyndaplang Diengdoh, haka point kaba 6 ka kren shai ba ym lah satia ban pynieng khyrdop khrong khajna haki surok National Highway, State Highway bad ki surok PWD ryngkat ka hukum jong ka sorkar jylla hadien ka jingïakren bad ka KHADC naduh u snem 2021 ba ym lah satia ban pynieng khyrdop haki surok bah, na kata ka daw la khang noh ïa katei ka khyrdop kaba long pyrshah ruh ïa ka work order bala pynmih hi da ka KHADC.
Ïa katei ka khyrdop bala pynieng da ka KHADC hapoh ka jingïalam ka party VPP la khang noh da ka bor district haka 16 tarik mynta u bnai bad kane ka dei ruh ka sien ba ar namar ha u snem 2023 ka bor district ka la dep ban khang khyrdep ïa ka khyrdop bala pynieng ha katei ka juh ka jaka.