Leit jngoh u CM ïa ka Shillong Engineering College, kynduh ïa ki nonghikai shwa ban plie ïa ki Klass

Shillong, Jymmang 19 : U Myntri Rangbah ka Jylla Meghalaya, u Conrad K. Sangma, ha ka sngi Nyngkong, u la leit jngoh ïa ka Shillong Government College of Engineering, kaba la ïoh ïa ka jingmynjur na ka All India Council for Technical Education (AICTE) ban sdang noh ïa ki jingpule Undergraduate ha ka Civil Engineering bad Electrical Engineering na ka bynta u snem pule 2025-26.
Ha ryngkat ka jingsynran lang jong ki heh na ka tnad pule puthi bad ka Shillong Polytechnic College, u Myntri Rangbah ka jylla u la jurip ïa ka jingtei jong ka Engineering College bad kynduh ruh ïa ki nonghikai jong ka kolej ban sngewthuh ïa ki jingdonkam jong ka kolej.
Na ka liang u Myntri Rangbah ha kane ka sngi u la pyntikna ban pynbeit ïa baroh ki jingeh na ka bynta ban pynbiang ïa ki jingtei ban pynlong ïa ka Shillong Government College of Engineering kaba treikam kumba la bthah da ka AICTE. Ki nonghikai jong ka Shillong Polytechnic College ki la pyntip ruh sha u Myntri Rangbah ka Jylla halor ka jingdonkam ban bei tyngka na ka bynta ki jingwad bniah ha ka liang ka Science bad Technology, ha kaba u Myntri Rangbah ka Jylla u la mynjur.
U la ong ba mynta ka Chief Minister’s Research Fellowship (CMRF) ka bei pisa ïa ki jingwad bniah kiba ïadei bad Arts bad Culture ïa kaba yn pynïar shuh shuh ban pynrung lang wat ha ka Science and Technology.
Ka Shillong Government College of Engineering ka dei ka kolej sorkar kaba nyngkong eh ha ka jylla. Ïa kane ka jingmynjur lane ka Letter of Approval (LoA) la ai sha u Principal Secretary ka tnad Pule Puthi ha ka 30 tarik Ïaiong. Kane ka jaka pule ka don ha Mawlai Kynton Massar, East Khasi Hills district ka dei kaba la pynïasoh bad ka North Eastern Hill University (NEHU).
Ki ar tylli ki lain pule ba kynthup ïa ka Civil Engineering and Electrical Engineering kin sdang shwa da mar 30 ngut ki samla pule ha ka samoi sdang klas jong u 2025-2026.