Ther tyngeh ka MPYC ïa ka sorkar ba pynlong ïa ki eksam kam pulit ha ki sngi U Blei

By Mawphor Editor On May 20, 2025

Shillong, Jymmang 19: Ka Meghalaya Pradesh Youth Congress (MPYC) ka la dawa ïa ka sorkar jylla ba kan pynsangeh ïa ki eksam state-level kiba la thmu ban pynlong ha ki sngi U Blei bad ka la ther tyngeh ruh halor kine ki rai jong ka sorkar.
Kane ka la wan hadien ka jingkynnoh ba na ka liang ka sorkar ka rai ban pynlong ïa ka eksam thungkam pulit ka jylla ha ki sngi U Blei.
“Ka eksam kaba nyngkong la pynlong ha ka 18 tarik mynta u bnai kaba dei ka sngi kaba bun na ki khristan ki leit sha ki jingleh niam,” ong u general secretary ka MPYC u Chireng Peter Marak ha ka kyrwoh khubor.
“Nga kyrpad ïa ka sorkar jylla ba kan pynduh noh ïa kane ka jingpynlong ïa ki eksam ha ki sngi U Blei, bad kadei ban pynmih ruh ïa ki jingpynbna bad ban pynkut noh ïa kane ka jingpynlong ïa ki eksam ha ki sngi U Blei kum ka dak ka jingburom ïa ki jingngeit jong ki paidbah,” u la ong da kaba bynrap ba ka MPYC kan pynbah khlieh ïa ka sorkar halor kane ka rai.
U la ong ba ka jylla Meghalaya kam dei tang ka jylla kaba bun ki Christian, hynrei ka dei ruh ka jylla ha kaba ki Christian ki leit bha sha ki jaka mane ha kine ki sngi. Ka sngi U Blei ka dei ka sngi shuti na ka daw jong ka jingleit ïingmane bad kiwei kiwei ki jinglehniam.
“Ka rai jong ka sorkar ba la ïalam da ka NPP ban pynlong ïa ki eksam ym tang shi sngi hynrei ha kiwei ruh ki sngi U Blei ïa ki eksam thungkam kadei kaba la pynpaw shai ba kam don ka jingkitkhlieh bad kane ka wanrah ïa ka khubor kaba ktah ïa ki paidbah bad pyni ruh ïa ka jingbym burom ïa ki jingngeit jong ki nongshong shnong,” bynrap u general secretary.
“Ha ka jaka ban burom ïa ka jingngeit jong ki nongshong shnong, na ka liang ka sorkar pat ka la pyni da kaba ai kyrteng pynbna ïa ka wine store kum ka “Heaven Eleven” mynshwa. Shuh shuh na ka liang jong u Marak u la ong ba kane ka jingleh jong ka sorkar ym lah satia ban pyndiang naba ka dei ka eksam ba la pynlong da ka jylla bad kam dei ba la pynlong da ka sorkar pdeng.
“Kadei ka kamram jong ka sorkar ban pynbeit ïa ki tarik ha ba ïadei bad kine ki jingpynlong ïa ki eksam ba kim dei ban ïatyngkhuh bad ki sngi U Blei,” u la pynkut.