SHILLONG, Jymmang 19: Ka Rifiness Warjri, ka samla pule kaba dang 20 snem ka rta na St Anthony’s College bad kaba dei ka cadet jong ka 61 Meghalaya Girls Battalion NCC, ka la lah poi sha kliar jong ka pyrthei da kaba pyndep ban kiew ïa u lum Everest hynnin ka step.
Ka Rifiness Warjri ka la shah jied kum ka nongmihkhmat ba marwei na baroh kawei ka thaiñ shatei lammihngi ban don bynta ha ka NCC Mount Everest Expedition 2025. Ka kynhun kaba don 38 ngut ki dkhot ka la poi sha jrong jong u lum uba jrong 8,849 mitar ha ka por kumba 4:45 baje mynstep hynnin ka sngi.
ïa kane la pyntip lyngba ka kyrwoh khubor na ka tnad Directorate of Information and Public Relations hynne ka sngi Nyngkong.
Kane ka thong ba ka Rifiness Warjri ka la lah ban kynjoh ka long ka jingpynshisha ïa ka jingminot bad ka pynpaw ïa ka jinglah bad ka sap kiew lum jong ki samla ka thaiñ shatei lammihngi jong ka ri India.
Ka Rifiness ka bud ïa ki dienjat jong ki arngut kiwei pat ki kynthei ka jylla Meghalaya, ka Wansuk Myrthong kaba la kiew ïa u lum ba jrong tam ha ka pyrthei ha u snem 2013, bad ka Senior GCI Dolyne Kharbhih, jong ka 61 Meghalaya Girls NCC Battalion 2013 kaba dei ruh ka cadet barim ka NCC, na Ri Bhoi distrik kaba la pynurlong ha u snem 2016
Shuwa ka jingleit kiew ïa u Lum Everest ka Samla Rifiness ka la lah ruh ban poi sha ka thong ban kiew ïa u lum Abi Gamin, uba jrong 7,355 mitar ha Uttarakhand ha u bnai Nailar jong u snem ba la dep.
Ka samla Rifiness Warjri ka la pynlut ïa ki sngi jinglong khynnah jong ka ha dukan ‘Jylli’ shuwa ban kynriah sha Kynton-u-mon, Laitkor. Kadei ka khun balai napdeng san ngut shipara.
Ka Rifiness ka ai burom ïa ki kmie ki kpa jong ka, u Bah Shlurbor Kharmyndai bad ka Kong Diamondsea Warjri kum ka tyllong jong ka jingkyrshan ba khlem pud ha ka jingïaid lynti jong ka.
Ka jingjop jong ka Rifiness ym tang ba kadei ka jingjop ïa ka shimet hynrei ïa baroh ki briew jong ka thaiñ shatei lammihngi, “ki long kum ka sharak jong ka jingkyrmen. Ha ka thaiñ kaba bunsien ki lad la khanglad da ki jingeh namar ka jinglong jingman jong ka jaka, ka jingjop jong ka ka shai kdar, ka ai mynsiem ïa kiwei pat ban beh ïa kaei kaba ki angnud, wat la ki long kiba jngai katno katno ruh.
Ka jingsngewtynnad jong ka ïa ka kam kiew lum ka la sdang na ka jingdon bynta jong ka ha ka NCC ha ka por ba ka dang leit skul ha Auxilium Convent Shillong. Dei lyngba ka NCC ba ka jingsngewtynnad jong ka ïa kane ka jingïalehkai ka la sdang ban phuh, khatduh ka la pynlong ïa ka ban ïashim bynta ha ki kam bapher bapher jong ka NCC.
Nalor ka jingieid jong ka ban kiew lum, ka Rifiness ka dei ruh ka nongïalehkai Wushu martial artist bad ka kickboxer, bad mihkhmat ïa ka Jylla ha ki rynsan akop bapher bapher. Kine ki la ïarap ïa ka ban nangroi ha ka met bad ha ka jingmut jingpyrkhat, kaba la pynlong ïa ka ban jop ha ka jingleit kiew ïa u *Lum ba jrong tam ha ka pyrthei – U Lum Everest.*
