SHILLONG, Jymmang 19: Ka Meghalaya Football Association [MFA] ka pynpaw ka jingsngewlem halor ka jingkhlad noh jong u Bah Fullmoon Pyrtuh, u riew pawkhmat ha ka histori jong ka phutbol ha ka jylla Meghalaya. La kha ïa u Bah Fullmoon Pyrtuh ha ka 24 tarik u ïaïong 1964, ïa ka jingnoh synñiang jong u Bah Pyrtuh sha ka jingïalehkai (phutbol) bad ïa ka jylla yn kynmaw junom da ka burom bad jingsngewnguh.
U Bah Fullmoon Pyrtuh u la sdang ïa ka lynti ïaid ha ka jingïalehkai phutbol ha u snem 1978, ha kaba ula mihkhmat ïa ka Meghalaya ha ka Sub Junior National Tournament kaba la long ha Tinsukia. Ha katei kajuh ka snem, u la ïalam ïa ka St. Anthony’s Higher Secondary School sha ka jingjop ka ban sah jingkynmaw pateng la pateng da kaba rah ïa ka Subroto Cup, u mawjam kaba pyni ïa ka jingsdang jong ka kam kaba phylla.
U la mihkhmat ïa ka Meghalaya ha ki lympung ïalehkai bapher bapher jong ka ri, kynthup ïa ka Sub Junior Nationals, Subroto Cup, bad ka Santosh Trophy, palat phew snem naduh 1978 haduh 1989. Ka sien ba nyngkong ba u la ïalehkai ha ka Santosh Trophy na ka bynta ka Meghalaya kadei ha u snem 1981, bad naduh 1986-89, u la long kapten jong ka kynhun, ka jingpynshisha ïa ka jinglong nongïalam, ka jingtbit bad ka jingsngewthuh kaba jylliew jong u ïa ka jingïalehkai.
U Bah Pyrtuh u la mih madan ruh ha ki lympung ba pawnam jong ka ri kum ka Bordoloi Trophy (1978), ka ATPA Trophy (1983), bad ka Federation Cup (1983), ban pyni ïa ka sap jong u ha ki katto katne ki lympung ïalehkai kiba heh tam ha ka phutbol India.
Ha ki kyrdan lehkai klob, u la sdang bad ka Wahingdoh SC ha u snem 1978 bad u la ïalehkai na ka Ar Hima SC bad ka Blue Max SC, da kaba buh dak ka bym lah ban pyndam ha kano kano ka jaka (klob) kaba u la ïalehkai.
Ha u snem 1983, u la ïalam kum u kpaten jong ka Meghalaya State School ha ka National School Championships ba la pynïaid da ka School Games Federation of India. Ka sap ïalehkai ba kyrpang ba u la sei madan ka la pynlong ïa u ban shah jied ha ka kynhun jong ka Indian School Team, kaba la mihkhmat ïa ka ri ha ka 13th Asian School Football Tournament.
Ki kam jong u Bah Fullmoon Pyrtuh ki la long kiba kordor, u la long u nongmuna, u nonghikai, bad ka shap jong ka jingieid bad jingsarong ïa ka phutbol Meghalaya. Ka jingnoh synñiang jong u sha kane ka jingïalehkai kan dang ïai bteng ban pynshlur bad ai mynsiem ïa ki pateng ban wan jong ki nongïalehkai.
“Ka kynhun longïing jong ka phutbol ka Meghalaya ka sngewsih ïa ka jingduh noh ïa uwei na ki nongïalehkai phutbol ba tbit tam jong ka. Ryngkat ka mynsiem kaba sngewrit ngi pynpaw ïa ka jingsngewlem sha kiba ha ïing ha sem, ki paralok bad ïa baroh kiba u la ktah ïa ka jingim jong ki,” la pule ka kyrwoh jong ka MFA.
