Ka seng kam lajong kan khanglad ïa ki briew ba nabar ban wan trei shapoh kane ka jylla: Wailad Shylla

Jowai, Jylliew 19: U MLA ka Jowai Constituency ma Wailadmiki Shylla hynnin ka sngi saitjaiñ ula plie paidbah ïa ka dukan bam (M/S S.P Restaurant) kaba dei trai da ka kong Shibor Pakynteiñ kaba don ha surok bah Ladthadlaboh mar pyrshah bad ka M/s K. Rymbai Petrol Pump hajan ka lad Kiang Nangbah Govt. College Jowai.
Hashwa ban ot ïa u ribon la don ka jingïalang ba lyngkot ba la pynïaid da u ma P.R. lamare, la ïoh ruh ka jingkren na u Waheh Shnong ka Mihmyntdu ma Abul Phawa bad la ïoh ka jingkren na ka ktien U Blei na u Rev. D.S. Lyngdoh uba la pynkynmaw ïa ki lai tylli ki bynta da kaba ong haba sdang ïa ka kam dei ban leh ha ka kyrteng u Trai, kaba ar leh da ka jingngeit bad kaba lai da kaba shañiah u Blei.
Katba na ka liang u MLA kum u kongsan haba ai jingkren ula ong ka jingdon kum ki dukan kan ïarap ruh ban pynïoh kam pynïoh jam ïa ki khun samla, ha ka juh ka por u ong kum kane ka kam seng dukan kan ïarap ruh ban khanglad ïa ki briew ba nabar ban wan trei shapoh ka jylla.
Da kaba u ong kiba bun ki kam la wan trei beit da ki bar jylla namar ka jingbym treh jong ki khun samla ban shim ïa ki kam kiba don hapoh ka jylla. Kumta u kyntu ïa kiwei de ba kin bud ïa kane ka nuksa ba bha jong kane ka longkmie kaba la dep ban shah hikai ha kane kam shet bam bad mynta kala ïeng hala ki jong ki kjat da kaba pynïar shuh shuh ïaka kam.
Ula kyntu haba seng ïa kino kino ki jait dukan donkam bha ban jurip ïa ka jinglong jingman jong ka jaka khnang ba ka kam kan long kaba ïaid ïew hadien habud.
Shuh shuh ula pynsngew wat na ka liang jong ka sorkar ruh kala wanrah shibun ki lad jingïarap ïa ki samla lyngba ki loan bapher bapher bad kumjuh na ki Bank ha ryngkat ka subsidy kaba duna, u ma Wailad ula ai ruh ka jingkitbok kit rwiang ïa katei ka longkmie ba kan dang lah ban pynïaid ïa kane ka kam shakhmat bad ban ai ka jingshakri kaba bha tam ïa ki paidbah.
Ha kane ka sngi la ot ruh ïa u cake da ka trai dukan bad ka jingkhap ïa u ribon da u kongsan bad kane ka Restaurant ka don ruh ïa ka Hall na ka bynta ban pynlong ïa ki jait prokram bapher bapher.