Nongpoh, Jymmang 12: Ki Staff Nurse jong ka Nongpoh Civil Hospital ryngkat ki bor pynïaid mynta ka sngi ki la pynkut noh ïa ka Nurses Week ne ka taiew lehkmen jong ki Nurse, kaba dei ruh shibynta ka jingrakhe ïa ka International Nurses Day kaba la ju rakhe ha ka 12 tarik Jymmang kaba dei ruh ka lyngkhuh sngi kha jong ka Florence Nightingale kaba la tip kum ka nongshem jong ka Modern Nursing.
Na ka liang ki Nurse ki la shim bynta ruh ha ki prokram bapher bapher baroh shi taiew lynter halor ka phang ‘Our Nurses. Our Future. Caring for nurses strengthens economies’ bad pynkut pat mynta ka sngi da ka jingrakhe ba kyrpang kaba dei ruh ka sngi jong ki Nurse ne ka International Nurses Day bad lam ruh ïa ki khusnam sha ki nongjop ha ki jingïakop bapher bapher bala pynlong baroh shitaiew lynter.
Ha katei ka prokram la wan ruh ban shim bynta da ka Dr D Blah Medical Superintendent ka Civil Hospital Nongpoh kum ka kongsan kaba la shim ruh ïa ka bynta ban thang ïa ka sharak bad ban plie ruh ïa ka dur jong ka Florence Nightingale kum ka dak ka jingburom ha ka jinglenlade jong ka ban shakri kum ka nongsumar.
La sakhi ruh ha katei ka sngi da ka jingdonlang ka Danilla T. Sangma, Nursing Superintendent ka Civil Hospital Nongpoh ryngkat ki Nurse kiba trei ha katei ka jaka sumar jong ka sorkar.
Haba kren ha katei ka sngi ka Dr D Blah ka la ong ba ki nurse ki dei ki shipai bym ju don ba pyrto ïa ka kam kaba ki trei hynrei ki don ka jingkitkhlieh kaba khraw ïa ka kam khamtam ban wanrah ïa ka koit ka khiah kaba bit kaba biang la ka long ha ki jaka sumar ne wat ha ka imlang ka sahlang.
Ka la ong ruh ba ki nurse ki dei u dohnud bad klongsnam jong ka koit ka khiah bad kumba long mynta ki nurse ki long kiba dokam ym tang ha ki jaka sumar ne ki hospital hynrei ha ka imlang ka sahlang namar ka jingkoit ka jingkhiah ka dei kaba kongsan bad ngim la ban len ba ki nurse ki dei ki nongsumar kiba len lade bad ai ka jingshakri kaba bha tam sha ki paidbah kiba pang ba shitom da kaba peit bad sumar ïa ki khlem kynran dien bad khlem kheiñ ïa ka miet ka iong ba kin ioh ka jingkoit jingkhiah da kaba ieh shadien ïa ki jingeh jingjynjar.
