Shillong, Jymmang 12 : Ka Dorbar Bah ba nyngkong jong ka Kur Shangpliang ha ka lah sngi U Blei ha ka shnong Lyngïong, East Khasi Hills ka la long kaba shongkun lyngba ka jingwan ïasoh lang da kumba 1000 ngut ki paidbah da 8 tylli ki unit bapher bapher kiba don ha kylleng ka Bri u Hynñïewtrep.
Kine ki unit ki long na Shillong, Sohra, Mawsynram, Lawbah, Ri-bhoi, Nonglynkien, Mawpran bad ka Lyngiong unit. Ka jingthmu jong kane ka jingïalum lang ka long ban wanrah ka jingïaithuh ithaw par kur, ban pynrung ïa ka mynsiem ka jingtehsong, ka jingïaïeit mar kylliang, ban ïakit ïabah ha ka khia ka shon, ka jingïatylli lang kawei bad kiwei kiwei ki jingdonkam ha ki kam jong ka kur.
Ha kane ka sngi kaba nyngkong eh jong kane ka dorbar bah, la sdang ïa ka jingïalang da ka jingdwai na i Pastor Dalampher Shangpliang, kumjuh la pynïaid da u Chairman Bah Augustine Shangpliang. La ïoh ruh ïa ki jingkren lyngkot na ki nongmihkhmat jong baroh ki unit bapher bapher, kumjuh u MLA barim ka Mawsynram Constituency Bah H.M Shangpliang uba long u nongai jingmut jong ka Sorkar Jylla bad bad la pynkut da ka jingduwai na I Pastor Maxwell Shangpliang.
Ha kane ka sngi la pynskhem ïa ki nongkitkam jong ka Kur Shangpliang (Sengkmie) kiba kynthup ïa u Chairman Bah Augustine Shangpliang, Vice-Chairman Bah Arnold Shangpliang, General Secretary Bah Commander Shangpliang, Joint Secretary Bah Marcus Shangpliang & Bah Lasborn Shangpliang, Treasurer Bah Moonstar Shangpliang, Publicity Secretary Bah Trustman Shangpliang, kumjuh mar saw ngut ki dkhot na kitei ki phra tylli ki unit kiba kynthup ïa u President, Secretary lem bad 2 ngut ki longkmie kum ki dkhot ka EC Central Body.
La pynshongshit ha kane ka sngi da ki jingrwai bad jingshad na ki khun samla jong ka Unit Marsynram, Nonglynkien kumjuh na u Bah Wanbet Shangpliang lem bad ka jingrwai ‘Pyrta Shnong’ ba la rwai da u kaitor ba paw ka Jylla u Bah Kit Shangpliang.
Ha kane ka sngi la aiti ruh ïa ka lama jong ka Kur sha ka Mawsynram Unit, ka ban ïoh pynlong ïa kane ka Dorbar Bah jong ka Kur Shangpliang ha u snem ban wan ha shnong Mawsynram.
