Shillong, Jylliew 19 : Ka Mawkhar SC ka la sdang da kaba khur point ha ka jingïaid lynti jong ka ha ka lympung ïalehkai OC Blue Shillong Premier League 2021-22 hadien ba ka la ïakhaid da kaba thep mar shi kol bad ka Rangdajied United FC ha ka jingïakhun kaba la long ha ka sngi Saitjaiñ jong ka taïew ba lah dep ha madan Third Ground, Polo.
Ka Mawkhar SC kaba dei ka team kaba mih madan nyngkong ha ka Shillong Premier League ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong lyngba u Bansanbha Khongsdam ha ka minit ba 26.
Ka Rangdajied FC kaba la pynmih madan ïa ki rangïalehkai ba kynthup ïa u Chesterpaul Lyngdoh, Aiborlang Khongjee bad u Samuel Shadap ka la ïakhun tyngeh bad tang hadien lai minit ka la ïoh ban pynphai kylla lyngba ka kol ba la thep da u Chesterpaul Lyngdoh.
Ha ka jingïalehkai ka Rangdajied ka la ïoh ka kabu ban pynkhih jar lyngba u Aiborlang Khongjee uba la pyndep ïa ka bol da ka khlieh hynrei u rangap kol ka Mawkhar SC u Banshanskhem Khar-syntiew u la ïoh ban kem suk. Ka Mawkhar SC ruh ka khlem ailad bad pashat bol ha ka rukom kaba itynnad bha ha kaba u Aiban-rapalang Dohling ha ka minit ba 10 u la ïoh ban khyrwit ïa ka bol kaba lait salit ban rung shapoh ka jar.
Hapdeng ka jingïakhun kaba mar ïabiang bor, dei ha ka minit ba 26 ba u Banshanbha Khongsdam u la ïoh ban thep ïa ka shi kol shwa ba u Chesterpaul Lyngdoh un thep ïa ka kol pynïakhaid na bynta ka Rangdajied FC.
Da kaba ïathep mar shi kol, ka jingïakhun ka la nang ïathnem khamtam na ka jingwan ai mynsiem ki nongkyrshan ka Mawkhar SC ka la nang ïoh mynsiem bad ñion tyngeh sha ka kut jong ka Rangdajied hynrei ka la pynlehnoh ei katto katne ki kabu ha kaba ka jingïalehkai jong ka kylla step ka la kut noh da kaba ïathep mar shi kol.
Haba wanphai sha ka kylla miet, ka Rangdajied FC ka la pynkhlaiñ ïa la ka kynhun da ka thong ban pyntam kol, hynrei ka kabu ba u Wallambha Kharpran u la ïoh ha ka minit ba 81 ka khlem urlong.
Ha ka kylla miet ka jingïakhun ka kham lah shilliang ha kaba ka Rangdajied ka kham lah ban bat bol hynrei ka khlem lah pat ban pyndep ha ka liang ka thep kol. Kumta haduh kaba kut ki 90 minit baroh arliang ki khlem ïoh ban pynphai kol bad leit phai ïing da kaba ïasam mar shi point.
Ka jingïakhun SPL kan bteng biang ha ka sngi ba ar hapdeng ka Mawlai SC pyrshah ïa ka Shillong Lajong FC. Ka Mawlai ka la sdang da kaba khur jingjop katba ka Shillong Lajong ka la mad ka jingshah rem.
