Shillong, Jylliew 19 : Ka Gracious Givers Foundation (GGF), kawei na ki seng trei mon sngewbha hapoh ka jylla, ka la pynlong ïa ka jingïamareh marathon ha kaba la wan ban ïashim bynta shitrhem ki 50 ngut ki nongïamareh kaba la pynlong ha ka sngi Saitjaiñ jong ka taïew ba lah dep.
Ki nongïamareh ki la wan ban ïashim bynta na kylleng ki jaka bapher bapher ha katei ka jingïamareh ba la buh ryngkat ka phang pdeng kaba ong “Run For Peace”, kaba dei shi bynta ban ïalap ïa ka jingsuk bad ka jingïaieit hapdeng kiba bun ki thma kiba jia ha kylleng ka pyrthei.
Ïa ka jingmareh la sdang na State Central Library, sha ophis DC, St. Anthony’s College, Shillong Commerce, Don Bosco Square, Laitumkhrah police point, Fire Brigade, Dhankheti, Malki, Civil police point ba la pynkut pat ha kajuh ka jaka.
Ha katei ka jingmareh la jop da u Welbethstar Ramsiej, Sainkupar Jyrwa ba ar bad u Iwell John Ramsiej ha ka kyrdan ba lai.
