Nongpoh, Ïaïong, 29: Uwei u rangbah ba la 41 snem ka rta u la duh noh ïa la ka jingim, kaba dei hadien ba u la kynthih kynsan na kawei ka kali kaba pynher sted ha ka jingkieng Flyover kaba don ha Umïam.
Kumba la ïoh lum jingtip na ki Pulit ka Ri Bhoi, la ong ba kane ka jingjia ka la jia ha ka por 2:35 pm ha ka jingkieng Flyover kaba don ha Umïam, ha kaba kawei ka Kali Suzuki Wagon R kaba don ïa u nymber ML 05-AC-5114 kaba la ñiah da u Govinda Biswas na Assam ka pynher sted bha bad hadien ba la poi ha jingkieng Flyover ha Umïam utei u rangbah u la kynthih kynsan na jrong Kali bad hap shapoh ka jingkieng haduh ba u la mynsaw jur bad duh syndon ïa la ka jingim.
Une u rangbah uba la duh noh ïa la ka jingim, ha kane ka jingjia ba sngewsih la tip kyrteng kum u Nabin Singh (41) na ka shnong Mukhla bad kane ka jinghap jong u na katei ka Kali ka dei hadien ba ha ka jingpynher sted katei ka Kali ka la tyngkhuh ïa ka kynroh jong ka jingkieng Flyover kaba u shong hakhmat bad hap syndon najrong katei ka jingkieng kaba u la mynsaw jur na ki bynta jong ka khlieh.
La ïathuh ruh don lang ruh sa 2 ngut kiba shong ha katei ka Kali kiba kynthup ïa u Bijoy Singh, uba dei u para jong utei u ba la khlad na Mukhla bad u Baris Marboh na Puriang ki la mynsaw jur.
La ong ruh ba ïa kitei kiba la mynsaw la rah noh sha Civil Hospital Nongpoh ban ïoh ïa ka jingsumar bad dei hadien ba la poi ha katei ka jaka ai jingsumar ki Doctor ki la pyntip ba utei u ba hap na katei ka kali na jrong katei ka jingkieng Flyover ha Umïam u la khlad noh. Ïa katei ka kali la tan noh sha Umïam Police Station bad ka jingtohkit halor kane ka jingjia ka dang ïaid shakhmat, ong ka tyllong khubor na ki Pulit ka Ri Bhoi.
