Kyrshan tyngeh ka Meghalaya ïa ka sorkar pdeng ban khyrwit ïa ki kam pyntriem ha J&K

Shillong, Ïaiong 23 : U Myntri ba peit ïa ka kam jngohkai pyrthei ha ka jylla, Bah Paul Lyngdoh, ha ka sngi Balang u la ong ba ka sorkar jylla ka kyrshan tyngeh ïa ka sorkar pdeng ban khyrwit da kaba tyngeh ïa ki kam pyntriem ha Jammu & Kashmir.
Haba kren bad ki lad pathai khubor, u Myntri u ong ruh ba ka jingthombor ïa ki nongwan jngohkai ha Pahalgam, kaba dei ka jaka jngohkai ba itynnad ha Kashmir ba dang hap ha India, kadei ka jingleh kaba ym don shuh ka jingsngew para briew.
“Ka la dei ka kam bym don shuh ka mynsiem para briew. Ban ban shu pynlong langknia ïa ki nongwan jngohkai kiba noh synniang sha ka ïoh ka kot jong ka jylla kadei kaei kaei kaba ngam lah shuh ban pyrkhat,” ong u Myntri.
Nangta u ong ruh ba kum ka Ri bad kum ka sorkar jylla ki ai mynsiem bad kyrshan ïa ka sorkar pdeng ha ka jingthmu ban rat dyngkhong ïa ki kam pyntriem ha katei ka jaka.
Ha kajuh ka por, u Myntri u la pyntip ruh ba kum ka jylla ki la long kiba peitngor bad ïa kane u la buddien ruh bad ki BSF na ka bynta ka jingshngain jong ki paidbah. Shuh shuh u la ïathuh ba u la dep ruh ban kynduh ïa u DG jong ki BSF dang shen.
“Mynta ngin sa khot rung kam shuh kham bun ki pulit bad kumba phi tip sa kumba 3000 tylli ki kam pulit kin sa lait ban pyndap khnang ban pyntikna ïa ka jingshong shngain jong ki paidbah da ka jingïatrei lang ryngkat ryngkat bad ki bor pahara jong ka sorkar pdeng khamtam ki BSF,” bynrap biang u Myntri.