La rakhe ïa ka Rashtrapati Poshan Pakhwada 2025 ha West Khasi Hills

Nongstoiñ, Ïaiong 23: Ka Ophis jong ka District Programme Officer, ICDS Cell, West Khasi Hills District, ha ka sngi ba ar ka la pynlong ïa ka Rashtrapati Poshan Pakhwada 2025 ha MCH Hospital Nongstoiñ, ha ka phang pdeng, ‘Ka Popularization of the Beneficiary Module in the Poshan Tracker’.
Ha kane ka prokram la don ka jingpynrung kyrteng Aadhaar, ha kaba palat 300 ngut ki briew ki la wan ban shon Aadhaar, ryngkat ka jingpynrung kyrteng ïa ki syrnod kha bad ka jingpynsngewthuh paidbah halor ka Poshan Tracker na ka bynta ki nongïoh jingmyntoi na ki bynta bapher bapher jong ka thaiñ Nongstoiñ bad ki jaka ba marjan.
La pynrung ruh ïa ki nongïoh jingmyntoi na ki shnong kiba dang sah khlem kynthup bad kiba la thung sha ki Anganwadi Centre lyngba ka Poshan Tracker da ka CGHA bad ki nongtrei jong ka Nongstoiñ ICDS Project.
U Bah H.K. Thabah, Additional Deputy Commissioner ka West Khasi Hills District, u la long u Kongsan ha ka jingdon ryngkat lang jong ka Kong D. Pakynteiñ DSO, u Dr. T. Syiem Block Medical Officer, u Bah S. Nongsiej JRDO, Nongstoiñ C&RD Block, Kong B. Rynjah CDPO Nongstoiñ, Kong K. Lakiang CDPO Mawshynrut, Kong Z. Kharkongor Inspector, Food & Civil Supplies, kiwei pat nongtrei sorkar, ki Anganwadi bad kiwei kiwei.
Ha ka jingkren jong u, u Bah Thabah u la kyntu ïa ki kmie bad ki longïing ban kiar na kaba bam ïa ki jingbam ba la song, ki kyiad bad ka jingdih duma ha ka por ba pun khun, namar ka ktah jur ïa u khunlung kiba dang don hapoh ka kmie.
U la ban jur ïa ka jingdonkam ban bam ïa ki jingbam kiba tei met, kum ki soh, ki kait, ki jhur ki jhep ki bym khleh dawai na ka bynta ban pynbha ïa ka koit ka khiah bad ka jingroi jong ki khynnah.
U la kdew ba bun ki khynnah ha Nongstoiñ ki duna ha ka jingsan jingheh ha ka met ka phad, na ka daw ka jingbym biang ki bam kiba tei met, kane ka khang lad ïa ka jingroi jingsan jong ki baroh kawei.
U la pynshlur ruh ïa ki paidbah ba ki dei ban pyndep ïa ka jingpynrung kyrteng Aadhaar, kaba long kaba donkam bha na ka bynta ban ïoh ïa ki skhim bapher bapher na ka sorkar jylla bad sorkar pdeng, kynthup ïa ka MHIS (Meghalaya Health Insurance Scheme), ka jingsam khaw rashon, bad ki scholarship jong ki samla pule bad kiwei kiwei de ki jingdonkam lyngba u Aadhaar card.
U la pynkynmaw ba ka Sorkar Jylla ka la buh ïa ka tarik ba khatduh ban pynïasoh ïa u Aadhaar bad ki card rashon kan long ha ka 30 Ïaiong 2025, Kumta khnang ban lait na ki jingshah kyntait ïa ki jingmyntoi kiba ïoh lyngba ka Sorkar, ka long kaba donkam ïa baroh ban shon Aadhaar bad pynïasnoh shuwa katei ka por kaba la buh.
La ïoh ruh ban sam ïa ki Khusnam sha ki Nongtrei Anganwadi kiba trei bha jong ki block kiba pher bapher, kaba kynthup ïa I Kong Beltiful Nongsiej Nongstoiñ Block, Kong Carefully Lyngdoh Malwong, Mairang Block, Kong Badarihun Nongsiej Mawthadraishan Block.
Ïa ki khusnam BCO kiba la leh bha tam la pynkup sha u Bah Tony Marbaniang Nongstoiñ Block bad ka Kong Happiness Lyngdoh Mairang Block. Nalor kata, la sam ruh ïa ki Syrnod Kha sha ki 5 ngut ki nongïoh jingmyntoi ha kane ka prokram.
La pynkut ïa ka prokram da ka jingkhot ïa baroh ki nongshim bynta ha ka imlang sahlang, ban ïatreilang ha kaba kyntiew ïa ka koit ka khiah bad ka jingbam kaba bha lyngba ka jingtreilang bad ka jingpyndonkam ïa ki lad katkum ki kor teknoloji jong kane ka juk.