ïap sa 13 ngut na jingtwa khyndew, ka kmie bad 4 ngut ki khun, ki shi kurim bad i khun

Yn dang jur u slap
Wat lada ha Shillong u slap u la duna, hynrei ka IMD ka dang buh ka jingmaham ba u slap un dang jur ha kine ki sngi ban wan. Mynta ka sngi kiwei kiwei ki jaka ki la don ka jingjur jong u slap.

Shillong, Jylliew 17: Ka jinglynshop ka mariang ïa ka jylla ka la ïai bteng ha ka sngi kaba ar, ha kaba mynta ka sngi sa 12 ngut ki briew ki la ïap na ka jingtwa khyndew bad ka jingkhyllem ki ïing.
San ngut na kine kidei na kajuh ka ïing kiba sah ha Dangar, Mawsynram C&RD Block. Kine ki long i kmie, i Kong Kyllity Langpen, 32 snem ka rta bad saw ngut ki khun, iba dang 12 snem, 5 snem, 3 bnai bad iba dang 6 bnai. U kpa jong kane ka ïing u Shanborlang Marak, u la mynsaw jur.
Kane ka la jia ha ka sngi thohdieng mynstep, haba ka khyndew ka la twa bad ban ïa kane ka ïing. Baroh shi ïing, ki don ha ïing bad kim shym la leit shano shano ruh namar ka jingjur palat u slap.
Ka jingduh noh ïa ki mynsiem ba kordor ka la jia ruh ha ki shnong ba marjan, kata ha Kenmynsaw ha kaba iwei i longkmie, i Kong Drit Byrsaw bad u Bah Robino Kynter ki la khlad noh na ka jingban ka ïing. Arngut ki khynnah ki la khlad ha Mawsynram C&RD Block. Iwei iba 7 snem ha Boro Ryngku bad iwei iba 12 snem ha Betgora A.
Ka jingtwa ki lum bad ka jingïap briew ka la pur ruh sha Garo Hills, ha kaba lai ngut na kawei ka ïing ki la duh ei la ka jingim na ka jingtwa ka khyndew ba long lum. Kine ki lai ngut kidei u Kpa, ka Kmie bad i khun ba dang rit, kaba la jia ha Bolsalgre, South Garo Hills. Kiba la khlad ki long ki shi kurim, ka Gamchia Ch. Sangma, 20 snem bad u Tengkam A. Sangma 31 snem bad i khun ba dang 4 snem.
Kawei ka longkmie ka la khlad udei ha Siju, West Garo Hills ha ka jingtwa khyndew.
Ha ka por ba twa kane ka khyndew na ka kala na long lum bad khlaw, la ïoh sngew ïa ka jinglynñiar ki paidbah, kaba da sngew synei khop.
Ïa kine kiba shah tyllep ha ka khyndew la ïarap ban sei da ki paidbah bad ki bor Pulit.
Ha kine ki 24 kynta baladep, kiba la khlad ki long 18 ngut, 5 ngut hynnin ka sngi bad 13 ngut mynta ka sngi.
La ïoh jingtip ruh ba la don ka jingjulor kawei ka ïing ha Sohra, Pdengshnong kaba dei ka ïing jong i Kong R. Khongsit. La ïathuh ba ki trai jong kane ka ïing ki la lait im da ka said, namar ba ki la ïoh phet kloi ha shuwa ban twa ka khyndew ïa ka ïing, kaba la pra lut phom. Kawei ka ïing ha Mawjam, Mawkynrew Block ruh ka la julor na ka jingtwa khyndew ha Shnong Mawjam.
Ha kajuh ka por na ka liang u Myntri Rangbah, u Conrad Sangma, mynta ka sngi, u la her kyrkieh sha nongbah Delhi ban ïakynduh ïa ka Myntri ka tnad pla tyngka jong ka ri India ka Nirmala Sitharaman ban pan jingïarap kyrkieh na ka bynta ka jingshah pynjot ka jylla ha ka jingshah lynshop ha ki bor ka mariang ha kine ki sngi baladep.
U Myntri ka tnad Revenue and Disaster Management, u Bah Kyrmen Shylla, u la pynpaw ka jingsngewkhia kaba jur halor ka jingpynjulor ka mariang, da kaba ong ba kadei ka jingjur slap kaba jur eh ha ki bun bun snem. U kyntu ïa i paidbah ba kin long phikir ïalade bad kan ïatreilang bad ki bor shnong, ki bor sorkar ban ïada na ki jingtwa ki ïing sem bad ka jingduh ei ki mynsiem ba kordor. U Bah Kyrmen ryngkat bad u Bah Eugeneson Lyngdoh, MLA Mawphlang, ki la leit jngoh ïuh ïa ka ïing kaba la shah duh ei saw ngut ki khun ha Nongspung.