Ka kmie ka la pan jingïarap na ki Pulit, hynrei ki shim sting: Dr. Phidalia Toi

Shillong, Jylliew, 17: Ka Meghalaya State Commission for Women (MSCW) kaba la buddien khlem sangeh ban tohkit bniah halor ka jingshah pynïap jong ki arngut shipara ha la u kpa u Jeofreeson Jana ha ka shnong Nongrah, ha ka sngi Palei ka la kynnoh ba ki Pulit jong ka Rynjah Police Station ki la shim sting bad leh bym suidniew ïa ka jingpan jingïarap jong ka kmie jong kine ki arngut shipara halor ka jingshah thombor ha la u jong u kurim na ka por sha ka por.
U Joefreeson Jana uba la 29 snem ka rta u la shah kem ha ki Pulit shi sngi hadien ba u la pynïap ïa arngut ki khun ha ka 30 tarik, Jymmang, iwei i khun kynthei ba dang 4 snem bad u khun shynrang uba dang 2 snem ka rta hajan kawei ka jaka saitjaiñ ba la tip kyrteng kum ka Dong Wahktieh.
Ha ka jingïakren bad ki lad pathai khubor, ka Chairperson jong ka Meghalaya State Commission for Women (MSCW) ka Dr. Phidalia Toi ka la ïathuh ba ha ka jingtohkit ïa ki bahaing hasem la lap ba u Jeofreeson Jana u la ktah kti ïa ka kmie jong kine ki arngut shipara ha ka 27 tarik, Jymmang, 2022 lai sngi shwa ba un dkhat jubor ïa ka jingim jong ki arngut ki khun. Kane la jïa ha surok ha ka por mynstep katba ka dang thmu ban leit sha ka kam bylla.
Ka ïathuh ba mar ïa ïoh jingtip halor kane ka jingjia ba sngewsih ki dkhot ka Commission ki leit sha Nongrah ban sngewlem bad ban ai jingïarap ïa kane ka longiing bad ka jingshim por ka Commission ban pynlong ïa ka jingtohkit ka long namarba ki hap ban sngewthuh ïa ka jingjia ba haduh katno ka ktah ïa ki bahaiing hasem bad ka kmie jong ki arngut shipara.
“Hadien ba la tep ïa ki khun, ngi la leit ban ïakynduh biang ïa ka kmie bad ïa ki bahaing hasem bad ngi la ïakynduh ruh ïa ki Pulit bad ha ka jingtohkit ngi la lap ba ka don ka jingleh sting bad ka jingleh bym suidñiew jong ki Pulit,’ ong ka Chairperson.
“Ka (Kmie) la telephone lyngba u Helpline Number (ban pan jingïarap) bad ki Pulit ki la tip bad ha ka jingïakynduh jong ngi bad ki Pulit ki la ong ba kane ka jingjia kam dei shuh jingjia banyngkong ba u (Jeofreeson Jana) un pyndik ïa ka kurim jong u,” ka la ong bad bynrap, “hynrei ki (Pulit) khlem leh eiei bad kane ka pynpaw ba ki Pulit ki leh sting bad ki leh bym suidñiew ïa kane ka longkmie kaba pan jingïarap.”
Haba kylli, ka Dr. Toi ka la ïathuh ba ka Women’s Commission kaba ladep ïakynduh ïa ki Pulit mynta ka dang pynkhreh ïa ki mat ban ai jingmut sha ka Sorkar ban leh ïa kaba donkam ha kaba ïadei bad kane ka jingjia.
“Na ka liang jong ka Women’s Commission hap ban pynlong ïa ka jingsyllok kaba paka bad ki bahaing hasem jong baroh arliiang bad ïa ka kmie jong u kpa uba la pynïap ïa ki khun. Ngi kwah ruh ban ïarap ïa ki Pulit ha kaba ym dei ban don mano mano ruh ba tuklar lane ban pynjem ïa ka case jong une u runar. Ka aiñ ka dei ban trei haduh ban da dep. Kata ka dei ka jingpyrkhat jong ka Women’s Commision,” ka la ong.
Ka la ïathuh ba ka jingïashong khlad hapdeng u Jeofreeson bad ka kurim ka dei na ka daw ba u ju ktah kti ïa ka manla ka por kaba la poi haduh u pud ba kam lah shah shuh.
Ka la ong ruh ba kat kane ka jingjia lada ki Pulit kim ïoh ïa ka ejahar ruh ki la dei ban ai da ka “Domestic Information Report” bad ïa kane ruh ki khlem leh.
“Nga lap ruh ba ki Pulit ki la shu pynkam ba ka dei tang ka jingïakajia shi ing shi sem (domestic disputes) ym ka jingshah ktah kti (domestic violence). Lada kdew ba ka dei tang ka jingïakajia ne ïamai shi ing shi sem ka case ka sting noh,” ka la ong.
“Ïa mynta kaba ngi lah ban leh na ka liang jong ka Commission ka long tang ban shu phah da ka jingthoh sha u Myntri ka tnat Kam Pohing bad sha u Director General of Police (DGP) halor kane ka jingjia,” ka la bynrap.