Shillong, Jylliew 17 : Ki nongïalam ka BJP ba kynthup ïa u bah Bashailang Khongwir bad u National Vice President ba dei peit ïa ka Meghalaya u Dr Chuba Ao mynta ka Sngi Thohdieng ki la leit ïa kynduh ïa u myntri ka tnad Tribal Affairs u Arjun Munda na ka bynta ba un shim khia ban pynsted ka jingpyntrei ïa ki Eklavya Model School kiba la mang na ka bynta ka jylla Meghalaya kiba ym pat sdang pat haduh mynta.
La ïakren ruh na ka bynta ban pynlong ïa ka National Tribal Festival da kaba ai jinghikai ïa ki khynnah skul bad samla pule halor ka pule ka dangle ka ban long ruh kum ka phang pdeng jong kane ka tamasa. Kine ki arngut ki la leit ïakynduh ruh ia u myntri khynnah kam pla pisa Dr Bhagwat Kishanrao Karad bad ïakren na ka bynta ban ïarap pisa tyngka ïaka jylla. Nalor kane la ïakren ruh ban plie shuh shuh ïa ki kad khaïi bad ka Bangladesh hakane ka jylla. Ki arngut ki myntri ki la pynpaw ba kin shim khia ïa kitei ki kam ba la pynpaw hakhmat jongki.
