Nalor ba la ïoh Yellow Card, sa ka Red Card yn ai ki paid Jaiñtia ïa ka VPP: Bah Sniawbhalang

Shillong Ïaïong 18: U National General Secretary ka NPP bad u Symbud Myntri Rangbah ka jylla u Bah Sniawbhalang Dhar ha ka sngi Thohdieng ula ong ba ki paidbah ka Ri-lum Jaiñtia kin sa ai da ka “Red Card” ïa ka Voice of the People Party (VPP) ha ka elekshon MLA jong u snem 2028.
U la ong, “Phi tip balei ba ki VPP ki leit man ka por sha ri-lum Jaiñtia?, ka dei namar ki sheptieng ïa ki paid Jaiñtia namar ba ngi la dep ai “Yellow Card” ha ka elekshon MDC ba dang shu dep, bad ngin sa ai sa da ka “Red Card” ha u 2028.”
“Ki la jan ïoh ïa ka Yellow Card ha ri-lum Khasi ruh. Ki la jop na baroh 29 seat ha ka elekshon MP hynrei ki la jop pat tang 17 seat ha ka elekshon KHADC. Ka long kumba la ïoh yellow card. Namar kane, ki la duh thiah duh dem bad ki bunkam ha ki jingkren bym don nongrim,” bynrap u Bah Sniawbha.
Kane ka jingkynthoh jong u ka la mih tang shisien hadien ba u President ka VPP Ardent M Basaïawmoit ula byrngem ban leit rah ïakren sha ka Election Commission of India (ECI) ba kan peitngor bha ïa ka ri-lum Jaiñtia ha shuwa ka elekshon MLA 2028 haba ai jingkren ha ki jingïalang paidbah ba long ha Jowai, West Jaiñtia Hills District.
Ka VPP ha ka shithi ba la phah dang shen sha u Chief Secretary, ka la dawa ïa ka jingtohkit ba laitluid halor ka jingbym lah jong ka Sorkar ban pynlong ïa ka elekshon kaba ïaid beit ïaid ryntih kaba khuid ba suba sha ka Ïingdorbar ka JHADC.
Ka VPP ka la jop tang 8 seat ha ka elekshon JHADC katba 17 seat ha KHADC ha ka elekshon kaba long ha u bnai Rymphang mynta u snem.
Halor kane u Bah Sniawbhalang ula kyntu ïa ka VPP ba kan burom ïa ka rai ba la ai da ki paidbah ka ri-lum Jaiñtia bad ban sngewbha ban ym hikai skul ïa ka ECI ba kumno kan pynïaid ïa ka elekshon.
U la ong, “Da ka jingjop elekshon JHADC, kam mut ba ka NPP ka la pyndonkam bakla ïa ka bor bad kam mut ruh ba ka VPP ka jop ïa ka elekshon KHADC namar ki la pyndonkam bakla ïa ka bor. Kaei kaba kongsan ka long ba ngi dei ban burom ïa ka rai jong u paidbah. Ban ong ba ngin leit sha ka ECI, nga sngew phi donkam ban ym hikai ïa ka ECI ba kaei kaba ka dei ban leh bad kaei ka bym dei ban leh.”
U nongïalam ka NPP ula ñiew ruh ïa kane ka kam jong ka VPP kum ka sienjam ba sheptieng bad jingbym sngew shngaiñ.
“Haba ki briew ki la tieng palat ki la sdang ban kren kutlad bad kren don ka thong bad ngam pat ju lap ïa kano kano ka seng saiñ pyrthei kaba ujor hadien ki elekshon da kaba kynnoh ba kam don ka jingïaid beit bad ka khuid ka suba namar ngi burom ïa ka rai ba la ai da ki paidbah. Ki briew jong ngi ki don ka hok ha ka por ba ki thep vote bad ki ophisar jong ngi ruh ki tip bha ïa ki kyndon kumno ban pynïaid ïa ki elekshon,” u la ong.