Jowai, Ïaïong, 15: Ha ka jingpyllait khubor u President ka Seiñ Raij Ïalong-Wahïajer, ma Pyrkhat Shylla la ong ba ka jingpynkhreh ka Raij na ka bynta ka leh niam kñia Ryngkaw, ka Nohsakyriat bad Shad Sukra jong ka Raij ka la ïaid shait shait.
Ïa ka lehñiam kñia Ryngkaw kaba pynïaid da u Langdoh bad ki 9 (khyndai) Wasan kin sdang ïa ka khrong, ka tri, u synñiang u bynhei na ki khun ki hajar jong ka Raij naduh ka 17 tarik mynta u bnai bad ha ka 22 tarik kin sdang ka shet pyrnah ka ban suit ban shor ha ka Duwan ka Dupat ka kñia Ryngkaw ka ban long ha khlaw Ryngkaw jong ka Raij kaba don ha rud-nong jong ka shnong Ialong. Ïa ka jinglehniam kñia Ryngkaw la ong ba kin sdang dangstep phyrngap ha ka 25 tarik (25/4/2025) ka ban sdang na ïing u Langdoh u Riblai jong ka Raij hadien ba la dep kñia Ryngkaw ha ka por kumba shi baje ei ei nohphaisngi yn sdang ka Nohsakyriat, ki ban shim bynta tang ki kynthei. Kum ban shu pynkynmaw kane ka Nohsakyriat ki ju pynlong tang ha shnong Ialong bad Nangbah.
Katba ha ka 26 tarik (26/04/2025) pat ka Shad Sukra kaba dei ka jingshad lehkmen lehsngewbha kaba ym don bynta eiei bad ka ñiam kaba shu long ka shad kmen shad sngewbha kaba pynneh pynsah ïa ka saiñdur bad saiñpyrkhat ki longshwa manshwa naduh mynbarim, ong u ma Pyrkhat Shylla, President ka Seiñ Raij Ialong-Wahiajer.
