Hiar jurip ki Myntri Sorkar ïa ki surok ba la shah shah ktah na ka jingther u lapbah, kular ban shna mardor

Mawkyrwat, Jylliew, 17: U Myntri jong ka tnad umbam umdih ka Jylla Meghalaya uba dei ruh u Nongmihkhmat ka Mawkyrwat Constituency, bah Renikton Lyngdoh Tongkhar bad u ba bat mynta kum u Chairman jong ka Regional Committee (RC) West, South West bad Eastern West Khasi Hills District ha ryngkat u bah Brolding Nongsiej, Myntri sorkar jong ka Water Resource da ka mynsiem jong ka jingsngewkhia bad jingkitkhlieh mynta ka sngi ka 17 tarik Jylliew, 2022 ki la hiar da lade ban peit bad jurip ïa ki katto katne ki bynta kiba la shah ktah na ka daw jong ka jingwan u slap u jur.
Ha kane ka jingleit jurip ki la leit ruh ban jngoh ïa ka surok kaba la shah pynjulor ha ka mariang ha kaba ki la twa bad dkhut kata ha ka shnong Rngi Sawlia kaba hap ha ka Eastern West Khasi Hills District kaba dei ka surok kaba pynïasoh ïa ki lai tylli ki district kata ka West, Eastern West bad ka South West Khasi Hills District bad kumjuh ruh ïa ka jingdkut ka surok kaba dei ïaid ha shnong Ngunraw, South West Khasi Hills District.
Haba kren sha ki lad pathai khubor u bah Renik u la ïathuh ba kane ka dei ka jingleit jngoh kaba nyngkong eh hadien ba la dep ban thaw hynnin ka sngi ïa ka Regional Committee ba dei peit ïa ki kam shah pynjulor ha ka mariang, u la ïaroh ïa ki Engineers kiba la shimkhia ban peit ba ka surok ka long kaba lah ban ïaid kali bad kyntu ruh ba kin leh kham kloi ban maramot ïa ka surok na ka bynta ka jingsuk ki paidbah.
Ha ka jingleit jurip ïa surok ka ban leit sha shnong Ngunraw, u bah Renik u la kular ba un sa thaw ki lad ki lynti ban ïa kren bad ka ophis PWD (Roads) ba da kano ka lad yn leh nangne shakhmat khnang ba kan nym buh jingeh ïa ki paidbah ha ka ïaid ka ïeng ne ban leit sha kiwei ki jaka na ka bynta ki jingdonkam. U la ong ruh ba da ka jingdkut jong kane ka surok ka la long shisha ka jingduh nong kaba khraw ïa ki paidbah nongshong shnong jong ka shnong Ngunraw namar ki don tang na kane ka lynti ba ki lah ban ïaid ne pyndonkam manla ka por.
“Lada ka long ynsa pyndap biang da ka khyndew ïa kane kaba la twa hynrei lada kam i long shuh ynsa thaw lad ban pynshna noh da ka jingkieng”, ong u bah Renik hynrei ban leh ïa kata kata ka shong ha ka jingïakren ïa pynbeit bad pynïaid shakhmat ïa ka kam.
Ha kane ka sngi la synranlang ruh u Superintendent of Police, South West Khasi Hills District, bah B.J. Laloo, MPS, u Deputy Superintendent of Police, South West Khasi Hills District, bah W.L. Nongpluh bad kumjuh ruh kiwei ki ophisar sorkar jong ka tnad PWD (Roads).