Nongstoiñ, Jylliew 17: Ka Vocational Training Centre, Manai, ïa kaba la seng kum shibynta ban kyntiew ïa ka kam ri jingri ha ka jylla Meghalaya, khamtam eh na ka bynta ki nongshong shnong jong ki lai tylli ki Distrik ka jylla, kata ka West Khasi Hills, Eastern West Khasi Hills bad South West Khasi Hills, kan pynlong ïa ki prokram ai jinghikai halor ka kam ri sniang, ri syiar, ri blang bad ri masi khem dud, naduh u bnai Jylliew mynta u snem haduh u bnai Lber jong u snem u ban wan.
Na ka bynta ki jingtip kiba bniah shaphang kane ka prokram hikai ri jingri, ki paidbah nongshong shnong ki lah ban leit mih sha katei ka centre kaba don ha Manai, Eastern West Khasi Hills District. Ïa kane la pyntip paidbah da I District Training Officer, Vocational Training Centre, Manai Eastern West Khasi Hills District.
