Nongstoiñ, Jylliew 17: Ka St Joseph Higher Secondary School Nongkasen kaba don ha Eastern West Khasi Hills District, kum shi bynta ban ai mynsiem bad pynshlur shuh shuh ïa la ki khynnah skul, ha ka sngi thohdieng ka la pynkup burom ïa la ki khynnah kiba la pas bha mynta u snem, ha kaba ka skul ka la pynlong da ka jingïalehkmen ha katei ka skul.
Katei ka jingïalehkmen ka dei kum ka ban pynsngewbha ïa khynnah skul, namar baroh ki khynnah kiba don haduh 108 ngut kiba na ka klas X bad XII bad kiba la thoh ïa ka eksam, ki la pas lut baroh khlem don ba pheil wat tang uwei ruh.
Napdeng kitei ki 108 ngut, na ka klas XII, 12 ngut ki la long ba nyngkong, 20 ngut kiba long ba ar bad 9 ngut kiba long ba lai. Hynrei na ka klas X pat 18 ngut kiba la long ba nyngkong, 27 ngut kiba long baar bad 22 ngut kiba long ba lai kynthup ruh ïa ki khynnah kiba la ïoh distinction ha ki sobjek bapher bapher.
U Fr Rolandus Lyngdoh Principal ka St Joseph Higher Secondary School Nongkasen, haba ai jingkren kum u kongsan, u la ong man la u snem ki khynnah na kane ka skul ki ju pas bha. Hynrei mynta ka kynti ka la long kaba phylla bad ka dei ruh ka sien kaba nyngkong, ba kin pas lut baroh naduh ki klas X bad klas XII bad ka dei shisha ka ka jingtreishitom ki nonghikai baroh ryngkat ka jingïatreilang ki khynnah skul.
Kiwei kiba la ïadonlang ki long u Fr John Albert Ryntathiang, babu Mesalin Lyngdoh Mawlot, babu Sylvester Mawleiñ bad kiwei kiwei ki nonghikai jong katei ka skul, kynthup ruh ki khynnah skul jong ka St.Joseph Higher Secondary School Nongkasen baroh kawei, kiba la ïashimbynta shitrhem da ki jingshad bapher bapher.
Ka skul kum ka dak ka jingai burom bad ka jingpynkup burom, ka la ïoh ruh ban sam ïa ki syrnod sha kitei ki khynnah kiba la pynïoh burom ïa ka skul ha ka District hi baroh kawei.
Ka jingpas bha jong ki khynnah kane ka skul ka long ka jingkmen ia ki kmie ki kpa kiba ju angnud ban iohi ia ka jingkiew shaphrang jong kane ka skul ha kiba bun ki liang khamtam ka dei ruh ka skul mishon ba la pyniaid da ka Balang Catholic.
Katkum ka jingsngew jong ki kmie ki kpa ki pynpaw ba ka jingpas bha jong ki khun ki jong ki ha une u snem ka dei hi ka jingaiti lut jong ki nonghikai bad ka jinglen lade, ka jingminot thop jong ki khun kiba la angnud ban ia kynjoh lem sha ka jingnang jingstad ha kane ka juk stad kaba manla ka longing longsem ka angud ban don ia ki khun kiba la nang la stad.
