Jowai, Ïaïong 13: Ryngkat lang bad ka Balang Catholic ha kylleng ka pyrthei ki riewngeit jong ka Jyllaniam Jowai kumba ju long shisien shi snem ki la rakhe ïa ka sngi u Trai Sla Tlai ban kynmaw ïa ka jingrung donburom jong u Trai Jisu Khrist ha nongbah Jerusalem arhajar snem mynshwa shwa ba un shah ïap halor ka Diengphna.
La sdang ïa kane ka jingrakhe da ka jingïaid proseshon kaba lyngkot na madan jong ka ïingmane bathymmai sha ka Iingmane barim jong ka St.Theresa’s Shrine, Marian Hill Higher Secondary School, Jowai.
Ha ka por mynsstep, la pynlong ïa ka jingkñia Mass Iukharist Bakhuid ha phyllaw jong ka Marian Hill ba la pynbynta da u Fr Augustine Lamin bad ka jingpule na ka Jingthoh Bakhuid katkum ka Gospel u Lukas.
U Fr Augustine Lamin haba ai ïa ka sneng ka kraw ha kane ka sngi, u la pynkynmaw ïa ki riewngeit ba ka sngi u Trai Sla Tlai ka dei ka jingsdang ïa ka taïew bakhuid, ka taiew ban ngam jylliew ïa ka jingmaïa bad ka jingieid jong u Jisu Khrist ha ka jingïaid lynti sha Lum Kalbari, uba shah lehbeiñ ha ki briew lajong na ka bynta ban pynim bad ban siewpsah ïa ki pop jong u khun bynriew ha sla pyrthei.
Ban pynskhem shuh shuh ïa kane ka jingpuson, u Fr. Augustine ula sot ruh na ka Kitab u Nongïathuhlypa Issaiah uba la thoh kumba 700 snem shwa ka jingwan longbriew jong u Jisu Khrist sha kane ka pyrthei ha kaba u la thoh thik kumno u Jisu lane u Messaiah un shah pynshitom bad shah banbeiñ ha ki briew la jong na ka bynta ban pynim ïa ka pyrthei.
Nangta u Fr. Augustine u ban shuh shuh da kaba ong, na ka bynta ban pynim ïa ka pyrthei bad ïa ngi baroh, u Jisu u la shah shitom da ka mon ba laitluid bad U Blei Um shym la iehnoh ïa u.
U Fr. Augustine, u pynkut ïa ka jingkren bad ka sneng ka kraw da kaba ong ba ka sngi u Trai Sla Tlai ka khot ka wer ïa baroh ki paid Khristan ban pynthymmai ïalade ha u Jisu bad ban ïaid bad U ym tang ha ka por jingsngewbha, ka por suk por saiñ, hynrei ban ïaid ruh ha ka por jingtynjuh bad ki jingeh ha ka jingngeit Khristan.
“To ai lyngba kane ka sngi U Trai sla Tlai bad ka taiew Bakhuid kan pynngam jylliew ïa ka jingngeit sha ka jingkmen Paskha lyngba ka jingshah pynshitom, ka jngshah pynïap bad ka jingmihpat jong u Trai Jisu Khrist na ka jingïap,” la bynrap shuh u Fr. Augustine.
