Nongstoiñ, Ïaïong, 13: La kumba ar snem tam haduh mynta naduh ba ka sorkar Meghalaya ka la dep pynbna, ba ka jingïakren pynbeit ïa pud u sam bad ka Assam ka la bit la biang, ha kaba ka la pynpaw ruh ba ki jaka kiba hap ha West Khasi Hills kiba la dep ban ïa pynbeit ki dei ka Tarabari, Gizang bad Athiabari kiba hap ha ka Hahim sector. Hynrei haduh mynta kim pat wan ban sieh ïa ki maw pud maw sam.
Ki riew rangbah jong ka tei ka thaiñ ba kynthup ïa u bah Mamot Sangma Headman ka shnong Namtarabari, kaba la ju tip kum ka Balsrek, u bah Salrak Sangma secretary ka shnong Borsung, u bah Tonik Marak Headman ka shnong Damrangkona bad kiwei kiwei, haba ïakren bad u nongthoh khubor, ki la ong ba naduh ba ka sorkar ka la pynbna ba ïa u pud u sam ha kitei ki jaka ba la dep pynbeit, ki paitbah ki la kmih lynti bad angnud ba ka sorkar kan wa ban sieh noh da ki maw pud maw sam ba thikna, khnang ba kan ym don shuh kano kano ka jingsngew artatien haba ki shong ki sah ki rep ki riang bad ki trei ki ktah ha kitei ki jaka.
Kiwei pat ki nongsynshar shnong ba kynthup ïa u bah Tonik Marak Headman jong ka shnong Damrangkona, u la ong ba kumba ki paitbah katei ka thaiñ ki ïoh ïa ki lad jingïarap na West Khasi Hills lyngba ka Mawshynrut C&RD Block, kumta ki sngew trai ïa katei ka thaiñ bad kim kwah ba ka Assam kan wan tuklar.
U la ong ruh ba ïa baroh ki jingdonkam kiba ïadei bad ka sorkar, ki paitbah katei ka thaiñ ki hap ban leit pynbit pynbiang ha ki ophis treikam bapher bapher kiba don ha West Khasi Hills, kum ha ka ophis jong u Deputy Commissioner, MECL, MNREGS bad kiwei kiwei. Hynrei ka sorkar Assam kam don bynta ei ei wat tang khyndiat ruh.
Ha kaba ïadei bad ka jingpynthikna ïa u pud u sam pat u bah Salrak Sangma Headman ka shnong Borsung, u la ong ba ki rangbah shnong jong katei ka thaiñ ki kwah ban pynkynmaw sha u Conrad Kongal Sangma Myntri Rangbah ka jylla bad ka sorkar, ba kim dei ban ïalehkai ne thok ïa ki paitbah ba ki la dep ïa pynbeit ïa u pud u sam. Hynrei ki dei ban da pynthikna noh da kaba sieh da ki maw pud kiba biang ba ka sorkar Assam ruh kan ym nud shuh ban kyntur sha ki jaka jong ka Meghalaya.
U la ong ruh ba lada kin shu thok ne pynbiej khlem da pyni da ki kam, ki paitbah kin dang shah pyndik shilynter ha ki briew ka sorkar Assam. Kumta lada ka sorkar ka kwah ban pynkut noh ïa ki jingeh ha katei ka thaiñ, ki dei ban wan sieh noh ïa ki mawpud mawsam ba thikna, khnang ba ka Assam kan ym nud shuh ban wan tuklar ne pyndik ïa ki paitbah na ka por sha ka por.
