Donkam kyrkieh ban buh ki lad jingïada aksiden ha lad Woodland bad lad Jowai Bypass: JSU

Jowai, Ïaïong, 08: Ka Jaiñtia Student Union (JSU) Jowai Circle ha ka sngi Baar hapoh ka jingïalam u President u Borntifulson Rupon kila leit ban ïakynduh ïa u Deputy Commissioner jong ka West Jaiñtia Hills District u A.K. Singh ban ïakren halor ki mat jingdawa kiba donkam kyrkieh.
Ka seng kala ïoh lad ban pynsngew ha u DC hadien ki jingjia aksiden kiba la jia khah khah hajan Jowai Civil Hospital, Ialong bad ha kiwei pat ki jaka kum ha Lad Woodland Hospital Sabahmuswang bad ha Lad Jowai Bypass ha kaba bunsien kiba bun ki mynsiem briew kila duh ei ïa ka jingim na kine ki jingjia aksiden ha kitei ki jaka.
Ha kaba ïadei bad kane ka bynta ka seng kala ïakren bniah bad ban dawa na utei u Khliehduh ka District ba dei ban buh noh da ki “Speed Breakers, Divider Lanes bad ki Clear Road Signs” ha kitei ki jaka ba long sensitive, khnang ban ïada na kum kine ki jingjia ba sngewsih.
Halor kitei ki jingpynsngew jong ka seng na ka liang u DC ula kular bam shimkhia ïa kine ki mat jingdawa bad ka seng ka kyntu ïa ka NHAI bad ka PWD Road Department ba kan leh mardor ïa kaba donkam, khnang ba kan pynsuk ïa ka leit ka wan jong ki paidbah babun balang bad ban long ka lad jingïada na ki jingjia aksiden.