Shillong, ïaïong, 08: U Myntri Rangbah ka Jylla Conrad K. Sangma ha ka sngi Baar ula ong ba ka Sorkar kan sa khot ïasyllok shwa ïa ki kynhun bapher bapher shwa ban pynduh pyndam noh ïa ka jingbun palat ki jingbuh kyrdan ïa ki skul ha ka jylla.
“Ka long ka jingangnud ban don tang katto katne ki kyrdan jong ki skul namarba ngi ïohi ïa ka jingmyntoi ha ka hynrei ka long kaba jwat pat ha kajuh ka por namarba manla kawei pa kawei ka kyrdan ka don la ki jong ki jingeh,” ong u Sangma haba ïakren bad ki lad pathai khubor.
Ka Meghalaya ka don baroh 14540 tylli ki skul kiba kynthup ïa ki skul Sorkar, skul shimet, SSA, Deficit bad Adhoc.
“Mynta, ban wanrah lang ïa ki ha kajuh ka shatri lane ha kajuh ka kyrdan ngi donkam ban da ïasyllok sani bha bad ki nonghikai, ki managing committee, ki kynhun bapher bapher bad namarkata ngi don ka thong bad ngin sa ïasyllok shwa bad ki paidbah,” u la ong bad pynshai shuh shuh, “na kata ka daw ba la phah bun tylli ki shithi sha ki kolej, ki skul, kiba hadien ba la ïohpdiang ïa ki shithi ki sngewkhia ïohba ka sorkar ka shim da ki sienjam ba tyngeh, hynrei kam long kumta. Ngin shu pynsngewthuh ïa ki jingeh kiba kyllaiñ jyrwit jyrwat namar khlem da sngewthuh ïa ki daw bad ka jingthmu ngin ym lah ban ïaid shakhmat.”
Da kaba pynpaw ba ka jingpeit bniah ïa ki jingeh ka dang ïaid shakhmat, u Myntri Rangbah u la ong, “ngi dang pyrshang ban sngewthuh ïa ki jingeh bad haoid, ka long kaba donkam ba ngi dei ban don ïa ki kyrdan kiba kham rit (ha ki skul) namarba ka kham suk ban pynbeit ïa ka rukom treikam bad ban pynïaid ïa ka rukom treikam bad ka ai ruh ïa ka rukom treikam kaba kham ïahap bha ha baroh kiei kiei hynrei kumba nga la ong ba kam long kaba suk ka donkam ban don ka jingïamir jingmut kaba kham bha na baroh ki liang.”
“Ka lah ban shim por hynrei ngi hap ban sdang shwa ïa ka jingïasyllok ban sngewthuh shwa ba ngin jam shakhmat,” u la ong.
Ïa ka jingbatai bniah ha ka wat kaba lai la pynshai da ka tnat Pule Puthi ha kaba ïadei bad ki jingeh ba la mad ha ka jingïalang jong ka Kynhun Myntri kaba la long ha kane ka sngi.
“Ka jingpule ka dei ka sobjek kaba kyllaiñ bha ym tang ha ka liang ka jingpule hynrei ha ka liang ki jingpynïabynta bapher bapher bad ki jingkheiñ kiba ngi don mynta ka long kaba kyllaiñ bha. Ngi hap ban law ïa ki sohkyrdot hynrei ngin hap ban leh ha kata ka rukom ka ban ym pynthud ïa ka rukom treikam,”la bynrap u Sangma.
U Sangma u la kdew ruh ïa jingeh kaba la ktah ïa ka PGI Index Ranking jong ka jylla.
“Phi don saw tylli ki skul ha ki kyrdan bapher bapher hynrei ki dei na kajuh ka skul hynrei tang namarba ngi don ïa ka kyrdan jong ki SSA, ki kyrdan jong ki skul Sorkar LP bad na ka bynta ka LP ki hap ha ka SSA, na ka bynta ka Upper Primary ki long kum ki Adhoc nangta na ka bynta ki Secondary ki dei ki Deficit bad na ka bynta ki Higher Secondary ki dei ki skul Sorkar kum kine ki jingbuh kyrdan ki pynhiar ïa ka kyrdan bad kajuh ka iing skul yn hap ban phiah ha ki saw tylli ki skul,” u la ong shuh shuh.
Kine ki dei ki daw kiba pynphiah liang hapdeng ki skul kaba pynhiar kyrdan bad kaba ktah haduh katta katta ïa ka PGI index. Hato ngin lah ban wanrah lang tang ha kawei ka kyrdan kan dei ka jingkylli kaba mih mynta namar ka jingdon ki SSA, kiwei kum ki Adhoc bad ki skul Sorkar, u la ong.
Kane ka dei ka jyrwit jyrwat kaba lam sha u pud ban pynhiar ïa ka kyrdan bad suki pa suki ngin sa pyrshang ban law ïa ki sohkyrdot.
“Nga ju ïai ong ba ngin weng ïa ki jingeh kiba sdang ban mih da kaba wad shwa ïa ka daw kaba pynmih jingeh. Ngim lah ban shu ryngkoh sha kaba kut khlem da tip shwa ïa ka daw tynrai jong ka jingeh,” la ong shuh shuh u Myntri Rangbah.
