Shillong Premier League : Sdang ka Langsning FC da ka nam jop, pynliem ïa ka Shillong Lajong FC

By Mawphor Editor On Jun 17, 2022

Shillong, Jylliew 16: Ka Langsning FC ka la sdang da ka nam jop ha ka lympung ïalehkai OC Blue Shillong Premier League 2021-22 hadien ba ka la pynliem noh da 1-0 pyrshah ïa ka lahduh jong kane ka lympung ka Lajong FC ha ka jingïalehkai ha madan Third Ground, Polo, Shillong.
Haba phai sha ka jingïakhun hapdeng kine ki ar tylli ki radbah jong ka Shillong Premier League ka jingïakhun ka long kaba itynnad bad ïakhaid bha, ka Shillong Lajong ka kham lah ban bat bol ha ka jingïalehkai jong ka kylla step.
Ka Shillong Lajong ka la ïoh ban pynsmiej katto katne ïa u rangap kol ka Langsning hadien ba u Hamedamanbha Wahlang, u la khyrwit ïa ka bol pynban ka la lait salit ban rung shapoh kol.
Ka jingïakhun ka la nang ïakhaid, ka Langsning FC ruh mynta ka samoi ka la pynkhlaiñ bha ïa ka bynta ba shadien hapoh ka jingïalam u Ambilstar Sun bad Dibinroy Nongspung.
Ka jingïakhun hapdeng kine ki ar tylli ki team ka la kut noh khlem da ïoh ban thep kol ha kaba kut jong ka kylla step. Haba wanphai sha ka kylla miet, ka jingïalehkai ka la nang ïathnem ba baroh arliang, naduh ka rukom pashat bad pyllait bol.
Hynrei dei ha ka jingïalehkai ba la ïaid 70 minit ka Langsning FC ka la ïoh ban plie pyrda lyngba ka kol ba la thep da u Shano Tariang. Lyngba kane ka shi kol ka jingïakhun ka la nang ïakhluit bad u Shano Tariang u la ïoh biang ka kabu ban thep kol hynrei u Rajat Paul Lyngdoh u rangap kol ka Shillong Lajong u la ïoh ban kyrda noh sharud.
Watla ki rangïalehkai ka Shillong Lajong ki la ïakhun tyngeh hynrei kim lah ban ksam sha ka kut jong ka Langsning na ka jingskhem ki rangïalehkai dien kaba pynlong ïa ka Langsning FC ban khur pura ïa ki lai point
Kadei ruh ka sien ba nyngkong ba ka Langsning FC kan pynliem ïa ka Shillong Lajong FC ha ka jingïalehkai Shillong Premier League naduh ka final kaba la long ha u 2018.
Ka jingïalehkai mynta ka sngi Thohdieng kan long hapdeng ka Malki pyrshah ïa ka Ryntih ha ka por 4 baje janmiet. Kum ban pynkynmaw hangne ba ka Malki ka la wanphai biang sha ka OC Blue SPL ha ka sien kaba nyngkong naduh u 2018 bad ka don ki rangïalehkai dang khie kiba tbit bad la khmih lynti ba kin ïalehkai bha ban jop pyrshah ïa ka Ryntih kaba pyndep ha ka kyrdan ba lai ha ka samoi 2019 kaba dei ruh ka sien ba nyngkong ba ka ïoh rung sha ka SPL.