Nongpoh, Lber 28: Ki nongïalam shnong jong ka shnong Nongrah Pyllun ryngkat ki longkmie longkpa bad ki khynnah skul mynta ka sngi kila mih paidbah ryngkat ki placard ban pynrem jur ïaka jingshah thombor kawei ka longkmie kaba la jia haka 19 tarik mynta u bnai katba ka dang don ha lynti ban leit trei sha Umroi Airport ba kum kitei ki jingjia kim dei shuh ban dang jia nangne shakhmat.
Kum ban shu pynkynmaw ba kawei ka longkmie kaba dang armet kaba la tip kyrteng kum ka kong Ellana Lyngdoh Mawphlang na Madanryting kaba sah wai ha Umroi Nongrah kala shah thombor haka step jong ka 19 tarik Lber katba ka dang don ha lynti ban leit trei sha Umroi Airport, ha uwei u runar bala tip kyrteng kum u Kyrshanlang Marngar na Dong rudwah da u bilor beer bala pait bad u maw haduh ba kan da mynsaw jur.
Dei halor katei ka nongrim, namar ka jingpynjah burom ïaka shnong bad ba kum ka shnong kam kwah shuh ba kitei ki jingjia kin dang jia nangne shakhmat, naka liang ka shnong Umroi Nongrah naka liang ka bor shnong hapoh ka jingïalam jong u Bah P Dkhar Rangbah Shnong lem bad ki paidbah ryngkat ki khynnah skul mynra ka sngi kila mih shakhmat ban ïaid paidbah ryngkat ki placard ban pynrem jur ïa katei ka jingjia bad ban dawa pynshitom ïa utei u runar u ba don mynta ha kti ki pulit.
Na ka liang u Rangbah shnong ryngkat katto katne ki rangbah bad ki longkmie haba kren ha katei ka sngi kila pynpaw ïaka jingsngewkhia halor katei ka jingjia shah thombor katei ka longkmie bad kum kitei ki jingjia kim dei shuh ka sien ba nyngkong namar haki snem bala leit kila don shibun ki jingshah thombor wat ïaki khyllung khynnah bad kane ka pynsyier ïaki kynthei khynnah, khamtam ka jingdon jong ki briew kiba ngop haki jingdih buaid.
Kila pynpaw ruh ba kum kine ki jingjia kim dei shuh ban dang jia nangne shakhmat bad ai khublei ïaka tnad pulit kaba la shimkhia mardor ban kem ïa u runar ba donkti ha katei ka kam.
