Shillong, Lber 19 : Ki la don palat 1200 tylli ki Self Help Group (SHG) kiba ïatrei lang khrui na ka bynta ban pyntreikam ïa ka Watershed Development Project ha ka jylla.
Ïa kane la ïathuh da ka Myntri ka tnad ka Rep ka Riang, Kong Ampareen Lyngdoh haba kren kum ka Kongsan ha ka Watershed Yatra kaba la pynlong lang artad ïa ka jingdie ïa ki mar ki mata ba wanah da ki SHG na kylleng ki bynta jong ka jylla ïa kaba la pynbit pynbiang da ka Meghalaya State Watershed & Wasteland Development Agency hapoh ka tnad Directorate of Soil & Water Conservation, Meghalaya, ha State Central Library Shillong.
Katkum ka jingïathuh da ka Myntri, ki la don ruh palat 1391 tylli ki ki jaka pynlang um kiba la dep ban shna ha ki palat 3000 hectare ki jaka ha kylleng ki bynta jong ka jylla hapoh ka New Generation Watershed Development Project of WDC-PMKSY 2.0.
Ka Myntri ka pyntip ruh ba kane ka jingkryshan pisa da ka jingtrie lang bad ki paidbah ka la long kaba seisoh. “Mynta ngi la lah ban pynkhie im biang ïa ki jaka shrah bad la lah ban pyndonkam biang ïa ki, nangta ban kyntiew ïa ka jinglong ka khyndew, ban ai sboh shuh shuh ïa ka khyndew khnang ba ki nongrep kin lah ban pynmih kham bun kaban ïarap pat ïa ka kamai kajih jong ki,” ka la ong.
Da kaba pyntip ba ka jingshna ïa ki 1391 tylli ki jaka pynlang um ha kitei ki 3000 hectare kan long kum u budlum ban kyrshan, ka Myntri ka pynpaw ruh ba kane ka la long ka jingkyrmen ïa kiba bun ki shnong kiba shem jingeh ban ïoh ïa ka umbam umdih ha ki bnai kyrduh um.
Shuh shuh ka ong ba ha kane ka juk ba ka jingkylla ka suin bneng ka ktah jur, ka Myntri ka ong ba ka jingpynkhyllem ïa ki dieng ki siej, ka jingnang hiar arsut ka jinglong ka khyndew, ka jingkylla sor ki jaka bad khamtam ka jingjur ka jingjaboh ka la buh ka jingma kaba khraw ïa ka um nalor ka jingma ïa ka jingkyrduh um. Ka ong ruh ba kine ym tang ba ki buh ha ka jingsyier ïa ka jingtyrkhong um hynrei ruh wat ïa ka jingbha jong ka um kaba lah ban ktah ïa ka koit ka khiah bad kumjuh ïa ka jingduh ha ka rep ka riang.
Ka Myntri ka la pynkynmaw ruh ba ka jylla ka la mad ïa ka jingïap tram jong ki jingthung ïa kaba ki la kren ruh ha Iing Dorbar Thawain ka jylla. “Dang shen ngi la ïa kren ruh ha Iing Dorbar shaphang ka jingïap tram ki dieng kwai bad pyrshang ban ïa kren bad ki MLA jong ki 60 tylli ki constituency ban treilang bad ki na ka bynta ban pynshlur ïa kane ka rukom pynlang um kaba dei ka sienjam kaba kongsan tam ha ka jylla ban pynneh pynsah ïa ka um.”
Shuh shuh ka la ong ruh ba ka long kaba donkam ïa ki shnong ki thaw ban nang tyngkai bad ruh ban pynneh pynsah ïa ka um.
Haba kren pat halor ka Watershed Yatra, ka Myntri ka la ong ba kane kadei ka dak ïa ka jingthrang jong ka sorkar ban poi sha baroh ki distrik jong ka jylla.
