Shillong, Lber, 18: Iwei i heprit kynthei ba dang saw snem ka rta ba la tip kyrteng kum i Elisha ïakai i la duhei ïa la ka jong ka jingim ha ka jingpluh jong ka iing kaba la shah bamduh ha ki thylliej ding barhem ha ka Lah Sngi u Blei ha ka por 8:00 baje mynmiet ha ka shnong Sahsniang-B, West Jaiñtia Hills District.
Ha kane ka jingjia, ka hymmen ka Glorify ïakai, 11 snem ka rta ka la lait im da ka said na ki thylliej ding. Kine ki arngut ki dei ki khun jong u Bah Mewos Shadap bad ka Kong Itaima ïakai.
U Dkhot jong ka Executive Committee ka Dorbar Shnong Sahsniang Bah Founder Syngkon u la ïathuh ba kane ka la jia ha ka por kumba 8.00 baje eiei mynmiet katba ka kmie ka dang don ha lynti naba wan iew. Ha ka por kine ki khynnah ki don tang arngut hapoh iing bad ki la ïohthiah bad haba ka Glorify ka la ïohsngew ïa ka jingsawa na ka kem ding jong ka ïing ka la pyrshang ban kyrsiew bad ban patan ïa la ka para hynrei namarba ka kam lah ban rah ïa ka para ka la mih pynstet shabar iing bad pyrta jingïarap na ki paramarjan.
U la ong ba la suba ba ka jingpluh ka lah ban dei na ka jingmeh ding ha ka dpei.
Ki Pulit pynlip ding bad ki Pulit jong ka Raliang ruh ki la poi ha ka shnong Sahsniang ban pynlip ïa ka ding kaba la bamduh lut ïa ka iing baroh kawei bad ïa ki jingdon jingem baroh.
