Jowai, Jylliew 14: Kum ka dak ban ïa snohkti lang bad ka pyrthei baroh kawei ha Jowai la rakhe ïa ka ‘World Blood Donors Day’ mynta ka sngi halor ka phang kaba ong ‘A Drop of Blood can Save a Life’. La sdnag ïa ka prokram da ka jingpule ïa ka Pledge bala ïalam da ka Additional Deputy Commissioner kong DD Syngai ryngkat u ma MA Challam, Extra Assistant Commissioner, Jowai, ha ka jingdonlang ka Dr. P. Shylla, Incharge Jowai Civil Hospital Blood Centre bad ki nongtrei jong ka ophis u Deputy Commissioner WJHD.
Shi bynta na kane ka sngi la pynlong ruh ïa ka jingsynñiang snam da ka Khynroo Khyllood Committee, Kur Sookpoh Khad-Ar Wyrnai, Jowai ha Jowai Civil Hospital Blood Centre. Kaba don ha Panaliar.
Ka Dr. P. Shylla, Incharge Jowai Civil Hospital Blood Centre, ha ka jingkren ka la ïathuh ba ka snam ka long kaba donkam eh ha ka jingim u briew kumta ka kyntu ba dei ban ïarap lem ban synñiang ïa ka snam na ka bynta kito kiba donkam kyrkieh ïa ka.
Kala pynsngew kiba lah ban ai snam ki dei kiba la dap naduh ka 18-60 snem ka rta, ka jingkhia kaba 45 kilo shaneng kiba don ïa ka hemoglobin level kaba ym duna ïa ka 12.5. Kala pyntip ruh ki shynrang ki lah ban ai snam shisien ha ka 3 bnai, hapoh shisnem ki lah ban ai haduh saw sien. Katba ï ki kynthei ki lah ban ai 1 sien ha ka saw bnai bad ha ka shisnem kan long 3 sien.
Kiwei de kiba ai jingkren ha kane ka sngi ki kynthup ïa ma L. Paswet, Ex Secretary Khynroo Khyllood Committee, Kur Sookpoh Khad-Ar Wyrnai, ma R. Syngkon, General Secretary, Kynroo Khyllood Committee, Kur Sookpoh Khad-Ar Wyrnai, Jowai bad u ma B. Shylla, President West Jaiñtia Adventure Cycling Association, Jowai kiba la ai jingbatai shaphang ka jingdonkam ban synñiang snam.
