Shillong, Lber 11 :Ka Balang Presbyterian Umlyngka ha u kyrwoh lyngba I Rev CN Kharbuki Pastor Incharge ka pyntip ba ka jingïaseng KJP Synod Pdeng kan long ha ka Balang Presbyterian Umlyngka naduh ka 13 tarik haduh ka 16 tarik Lber 2025.
Ka jaka pynlong jingïseng ha ka sngi U Trai kan long ha ka jaka ki Kur Thangkhiew Busla kaba don ha ka dong Mawsyiem kaba jngai kumba 3 km na Laimer.
Ki nongkren ha ka sngi U Trai, ha ka por 10:30 mynstep u Rev TS Wankhar, por 1:30 mynsngi Rev LS Nongphlang bad ka jingïaseng miet ha ka por 6:30 kan long ha ka ïingmane bad ban kren ïa ka sobjek Balang kaba ong, “Ka jingngeit kaba neh skhem hapdeng ka pyrthei jong ki jingkylla,” ban kren da u Rev HK Nongbsap.
Na ka liang ka Balang Presbyterian Umlyngka ka khot ka wer sngewbha ïa baroh ki paid riewngeit ban ïa wan sha kane ka jingïaseng ha ka sngi U Trai, kata ha ka 16 tarik Lber.
Na ka bynta ka jingbit jingbiang jong ki nongwan jingïaseng, na ka liang ka Balang ka la pynbeit ba ki kali rit kiba wan na ki thaiñ ka Khadar Blang Presbytery, Mylliem Presbytery, Mawkynrew Presbytery, Lum Rapleng Presbytery bad Shillong Sepngi Presbytery kin wan beit na Sanmer, Mawklot, Nongumlong bad poi sha Umlyngka, bad ki Bus kiba wan na kine ki Presbytery kin wan beit na 3 Mer, Entry No. I.
Ki Bus kiba wan sha kane ka jingïaseng kin ïeng ha syndah jong ka Community Hall jong ka shnong Umlyngka.
Na ka bynta ki kali rit kum ki Sumo bad kiwei kiwei pat ki lah ban pynïeng shaduh jaka long jingïaseng abd ka por ban shah ban rung shaduh jaka long jingïaseng kan long hapoh jong ka 10 baje mynstep bad palat ïa katei ka por kin ïoh ban ïeng kham pajih na jaka long jingïaseng Synod.
Kum ka Balang ka kyrpad ïa baroh kiba wan sha kane ka jingïaseng ba kin burom ïa ka jingpynïaid jong ki Traffic Police / Volunteer khnang ba kan ym don kano kano ka jingsahkut kali.
Ka Balang ryngkat ka jingïatreilang bad ka Dorbar Shnong Umlyngka ka la pynbeit ruh ban ym shah ban die jingdie ha shilynter ka surok shnong haduh ka jaka long jingïaseng khnang ba kan ym don ka jingpynwit ïa ka ïaid ka ïeng jong ki nongwan jingïaseng.
