Shillong, Lber 11: Ka jingtei ïa ka ïing dorbar kaba thymmai la khmih lynti ban pyndep ha u bnai Nailar jong u ne u snem.
Ïa kane la pyntip da u Symbud Myntri Rangbah ka jylla u ba khmih ïa ka tnat PWD (building) u Bah Prestone Tynsong haba jubab ïa ka jingkylli hapoh ka dorbar mang tyngka ha kane ka sngi baar.
Lah ban ong ba ha ka 3 tarik mynta u bnai u Lamphang ka ïing dorbar thaw aiñ ka jylla u Thomas A Sangma u la pynthikna ba ka ïing dorbar ka ban sa long ha ka por ban wan kan dei noh hapoh ka ïing dorbar kaba ha Mawdiangdiang.
“Nga lah ban pynthikna ïa phi ba ngi la pyrshang katba lah ban pyndep noh ïa ka ïing dorbar kaba thymmai bad ngi khmih lynti ruh ba ngin ïoh shong ïa ka ïing dorbar ha kane ka ïing kaba thymmai,” ong u Sangma da kaba bynrap ba ki kam ki la ïaid shakhmat bad kaba dang sah mynta ka long sa tang ki jingtei kiba shapoh jong ka main hall. Ka jingtei ïa u dome ka dang shim ïa ka por bad ngi kyrmen ruh ba kane ka kam kan dep noh kham kloi ha ka por ba la buh,” pyntip u Sangma.
