Nongpoh, Lber 11: Da ka jingkmen bad sngewsarong halor ka jingjop donburom jong u Bah Sosthenes Sohtun kum u MDC na Jirang Constituency, ki nongïalam shnong, ryngkat ki paidbah nongshong shnong ka shnong Lumnongrim Byrnihat haka sngi Saitjaiñ kila pynkup burom ïa u Bah Sosthenes Sohtun u ba long ruh mynta u MLA bad MDC ka Jirang Constituency.
Ïa katei ka jingpynkup burom la pynlong ha iing Dorbar jong ka shnong Lum Nongrim Byrnihat ha kaba la sakhi da ka jingdonlang ki nongïalam shnong naduh u Bah Iaineh Wahlang Rangbah Shnong, Samla Vigyan Kharkongor President ka seng samla lem bad ki paidbah nongshong shnong naduh ki samla lem bad ki longkmie longkpa.
Kum ka jinglehkmen halor ka jingjop don burom biang u Bah Sosthenes Sohtun ban long sa u MDC hadien ba u la long ruh u nongmihkhmat MLA na katei ka thaiñ, naka liang ki paidbah naduh ki khun samla kila shim bynta ruh da ki jingshad bad rwai kum ka dak ka jingkmen, namar u Bah Sosthenes Sohtun u dei u nongshong shnong jong katei ka shnong.
Haba kren ha katei ka sngi naka liang u Bah Sosthenes Sohtun u la ai ka jingkhublei ba kyrpang ïaki nongïalam shnong jong ka shnong Lum Nongrim bad ki paidbah nongshong shnong hi baroh kiba la kynmaw ban pynkup burom ïa u ha kane ka sngi bad khamtam ka jingkyrshan ba radbah jong ki paidbah kiba la pynjop donburom ïa u kum u MDC ha kane ka elekshon MDC ba dang shu dep bad kane ka dei ka jingïeid ba ki paidbah ki dang shañiah ha u ban kit ïaka lyngkor kum u nongmihkhmat sha ka iing Dorbar thawaiñ ka jylla bad kumjuh ruh sha iing Dorbar jong ka KHADC.
