Nongpoh, Lber 10: Hadien bun ki jingïaid lynti bad ki jingeh bala mad da ki nongri syiar haka them Ri-Bhoi, ka kynhun ki nongri syiar hapoh ka lama ka Ri-Bhoi Poultry Farmers Association (RBPFA) mynta ka sngi kala ioh ban plie paidbah syndon da ka ophis treikam ba pura ha Nongpoh Town Shopping Complex ban ai ka jingshakri naka bynta ka bha ka miat ki nongri syiar ha kane ka district.
Ïa katei ka ophis treikam ba pura jong ka RBPFA la plie paidbah da u Dr Esra Syiem, Animal Husbandry and Veterinary Officer ka Ri-Bhoi District kum u kongsan haka jingdonlang u Bah Silvester Mynsong Rangbah Shnong Nongpoh, ki nongïalam ka RBPFA naduh u Bah Antonio Lapang Adviser, Kong E Lapang President, Bah A Diengdoh Vice President bad kiwei kiwei.
Haba kren ha katei ka sngi naka liang u Bah A Lapang nongaibuit katei ka seng u la ong ba ka jingthmu katei ka seng ki nongri syiar ha Ri-Bhoi ka long ban shakri ban kyntiew ïaki nongri syiar ka thaiñ, kumba bun naki nongri syiar haka them Ri Bhoi kila sdang ban kynran dien noh namar ka jingshah khñiot dor palat ka iew syiar haduh ba kim shlan ruh ban ri namar ka jingduhnong kala long kaba shyrkhei.
U Dr Esra Syiem kum u kongsan haba kren ha katei ka sngi u la ai ka jingïaroh ïa katei ka seng wat hadien ka jingbym treikam la kumba katto katne por hynrei da ka jingshimkhia ki nongïalam ba thymmai katei ka kynhun mynta ka sngi kala ioh ban plie syndon da ka ophis treikam ba pura bad kyrmen ruh ba katei ka seng kan lah ban ai ka jingshakri sha ki para nongri syiar kumba ki thmu bad angnud.
U la ong ruh ba kum uwei naki ophis ka tnad Veterinary bad kumjuh ruh u doctor ba ju sumar ïaki sumar ula kular ban ai ka jingïatreilang bad katei ka seng ha kiba bun ki liang ha kaba ïadei bad ka kam ri syiar, namar ka kam ri syiar ka dei ka lad kamai ïakiba bun ki samla ban ieng hala ki jong ki kjat bad lehse wat ban aikam lem sha kiwei pat ki para samla ha kane ka juk kyrduh ba mynta.
