Shillong, Lber 09 : U Myntri Rangbah ka Jylla, Conrad K Sangma u la pyntip ba hapoh ka skim shna iing baduk lane ka PMAY-G, ka Meghalaya kala kynjoh sha ka 73 persen ban pyndep ïa ka jingshna iing la ka long ha nongkyndong bad kumjuh ha sor katkum ka thong jong ka sorkar ban pynïoh iing ïa ki hajar ngut ki longiing ha ka jylla.
Haba pynpaw ïa kane haba wanrah ïa ka Mangtyngka mynta u snem, u Myntri Rangbah u la ong, “Hapoh ka PMAY-G, ngi la kynjoh sha ka 73 persen ka jingpyndep ïa kajingshna iing, kata da ki 1.37 lak tylli ki iing kiba la dep ban shna na ka thong kaba long 1.88 lak tylli. H au 2025-26 ngin sa pyndep lut ban shna ïa ki 50,000 tylli ki iing kiba dagn sahteng ban pyntikna ba baroh ki longiing kiba dei hok ki ïoh ïa ka iing ka sem lajong.”
Nangta u ong ruh ba da ka jingpynjynsur sa san snem ïa ka skim PMAY-G, u Myntri Rangbah u ong ruh ba ki kyrmen ba yn lah ban pynïoh iing sha baroh ki longiing kiba khlem pat rejistar ruh kiba khlem shah kynthup ha kane ka skim. “Nga kyrmen ba ha kine ki lai snem ban wan ngin lah ban pyndep ïa ka thong ha ki nongkyndong jong ka jylla.”
Shuh shuh u ong ruh ba kiwei ki jingtei kum ki painkhana, ka bordig bad ka jingpynpoi ïa ki tyndong lyer shet kin sa pyntikna sha baroh ki nongïoh ïa ka skim PMAY-G.
“Nga sngewkmen ban pyntip shaphi ba naduh ka samoi 2025-26 ia ka PMAY-G 2.0 yn sa pynïar sha ki saw tylli ki sor ba kynthup ïa ka Sohra, Khliehriat, Ampati bad ruh ha Mawkyrwat. Nga la mang 70 klur na ka bynta ka Chief Minister’s Housing Assistance Program,” u la ong.
