Shillong, Lber 09: Ka Seng Samla Mawlai Pyllun (SSMP) hadien ba ïoh jingujor na ki paidbah Mawlai khamtam ki nongshongshnong Nongkwar BL-13 ka pynpaw ka jingsngewdiaw ïa ka jingkhlem akor bad lehsih ki briew kiba bret pathar ïa ki niut na ki ïing bad na ki dukan jong ki ha shi lynter ka surok bah shwa ban poi ka khyrdop ka Marten.
Katkum ka kyrwoh, la ong ba ka Seng hadien ba ka la ïoh ïa ki jingujor ka pynrem jur ïa kito ki briew ba khlem akor lada dei mano mano ruh kiba wan ban bret ïa ki snep dohkha, snier bad snep syiar kiba wan bret pathar ïa ki niut, ïa ki ksew bad ki miaw ba la ïap la pyut, ki snep masi ki doh pyut da ki kali.
Ka Seng ka ong ruh ba ka long ka jinglehrain ïa ki naba ha ki iing ki sem ki leh khuid katba tang shu lai na iing ki la shu bret pathar kat shaba lap.
“La ïoh jingujor ruh ba don ki briew kiba wan da ki kali remdor kiba pynlang nuit ha ki plastik ynda la poi ha kine ki thaiñ ryngkat ka pynher stet ka kali ki la shu kawang ïa ki ñuit sha kine ki jaka. Ka seng ka wer ïa ki paidbah nongshong shnong kumjuh kiba ïaid na kine ki bynta la kadei kiba shu ïaid kjat ne da ki kali ba kin sngewbha ban kem ne shondur ïa ki briew ne ïa ki number kali kiba bret niut pathar ban daiñ kuna kaba heh nangne shakhmat ne pyntip sha ki nongïalam shnong ne sha ka Seng,” ong ka kyrwoh.
Katkum ka kyrwoh na u General Secretary ka SSMP, Bah Eddiewigh Majaw la ong ruh ba ka Seng ka kyntu ïa ki bor ba dei peit ïa ka Marten kata ka Shillong Municipal Board ba kin buh noh da ki CCTV ha kine ki bynta khnang ban ïoh kem ïa ki riewkhlem akor. “Ka long kaba i saitmet bad ka jingpynrem kaba khraw ïa kito ki briew kiba nang tang ban lehkhuid, lehstai, deng tai katba ïa ka niut na ïing la shu bret sha surok tangba la lait na ïing,” la bynrap biang ka kyrwoh.
Ha kajuh ka por, na ka Seng khnang ban lait na ka jingijaboh bad i saitmet ki dkhot ki la mih ban pynkhuid nohia kitei ki jaboh jabain ba la bret da ki briew ki bym lah ban ithuh.
