Shillong, Lber 06: Ka Meghalaya State Olympic Association [MSOA] ka la ïashim bynta ha ka Australia -India Sports Excellence Forum ha kaba u Bah John F Kharshïing, Working President jong ka MSOA, u la shah khot sngewbha ban don bynta ha katei ka jingïalang kaba la long ha ka 5 haduh 6 tarik u Lber, 2025 ha ka GIFT City Club, Gandhinagar.
Kane ka jingïalang la pynlong kyrpang ban tei ïa ka jingïadei kaba jan hapdeng ka Australia bad ka India bad ban ïakren halor ka Olympic bad Paralympic ka ban sa wan. Na ka liang jong u Working President jong ka MSOA u la pynpaw ba kane ka long ka kabu kaba khraw ban shah khot ban don ha kane ka jingïalang jong ka Australia -India Sports Excellence Forum.
Ka jingthmu jong kane ka jingïalang ka long ban wad ïa ki lad ki lynti bad ka jingïatreilang ha ki bynta ba kynthup ïa ki jingïalehkai Olympic bad Paralympic kiba pynroi ïa ki sap ïalehkai.
Ïa kane ka prokram la pynïaid da u HE Philip Green, OAM, u High Commissioner jong ka Australia sha India, u Raksha Khadse uba dei u Myntri ka Sorkar Pdeng ba dei peit ïa ki kam ïalehkai, nangta u Myntri ka tnad Sports jong ka Gujarat, u Harsh Sanghavi.
Na ka liang jong u Bah John F Kharshiing, Working President jong ka MSOA u la ai khublei ïa u HE Philip Green, OAM, Australian High Commissioner sha India, na ka bynta ka jingshah khot bad na ka bynta kane ka jingthmu kaba kongsan bha ban ïasam ïa ka jingshemphang ha ka jingpynkhreh ïa ka jingtyrwa bad jingpynkhreh ban ïatreilang. U Working President ka MSOA u la ioh ruh ban ïakren bñiah bad ka Robyn Smith, OAM, Dkhot jong ka Board Synshar jong ka International Paralympic Committee, halor kumno ka long kaba kongsan ban kynthup lang ïa ka Para Sports ha baroh ki lympung ba heh.
Na ka liang jong ka Robyn Smith, ka la sngewtynnad bha ban tip ba ka Meghalaya ka ju pynlong ïa ki lympung ïalehkai jong ka jylla bad ka la sngewtynnad ruh ban tip kham bñiah shaphang ka National Games 2027 ka ban sa wan ban pynlong da ka Meghalaya bad ka jingïalehkai kaba 4 jong ka North East Games 2025 ka ban long ha North East bad ka la ai jingmut ban pynlong ha kajuh ka por ïa kawei ne ar tylli ki jingïalehkai para Sports.
