Jowai, Jylliew 13: Hadien ka jingujor ka Jaiñtia Student Union (JSU) halor ka jingshah eh beiñ khlem da pyntreikam ïa ka ‘Amphitheatre’ kaba la dep ban shna da sorkar jylla lyngba ka tnad Arts & Culture bad la plie paidbah naduh ka 3 tarik u Nailar, 2017 da u MLA ba rim ba Prof. R.C. Laloo uba long kum u symbud myntri rangbah ha kato ka por.
Hynrei ïa kane ka ‘Amphitheatre’ kaba don ha Moolasyat, Jowai hajan ka Reserve Police la eh sah ïa ka khlem da pyntreikam satai la san snem mynta, watla kane ka jaka ka long kaba la biang nadong shadong ban pynlong ïa kino kino ki jait jingïalang ne ki Tamasa ba bun jait.
Haba la leit jurip ïa kane ka Building la lap ba kala long kum ka ïing bala eh shrah da ki bor ba dei peit, kaba la long pynban ka jaka ïashong dih bad leh ïa ki kam sniew da ki riew shim kabu, la sakhi ruh ïa ki jingkhang, ki Wiring bad kiwei de kila julor lut.
Na ka liang u Myntri haba kren sha ki lad pathai khubor ula ong halor kane ka jingshah eh shrah jong katei ka ‘Amphitheatre’, yn pynshitom tyngeh ïa ki ophisar kiba dei peit ïa kane ka jaka kaba la shu pynleh noh ei ïa ka naduh ka snem 2017.
Ula kren shai ‘ka mut aiu ban shna ïa kane ka Amphitheatre la san snem khlem da pyndonkam, da kaba kynthoh jur ïa ki ophisar ba kim shem la lah ban pyndonkam ïa ka haduh kine ki sngi’
Ula kyntu ba dei ban phah noh da ka ‘Join Petition’ ba la ïasoi ryngkat ka treilang ka JSU bad ki Waheh Shnong ban maramot noh ïa baroh ki bynta ba donkam kaba kynthup lang ïa ka jaka pynïeng kali.
U samla Treiborlang Suchen ula ong ba ka JSU ka pynpaw ka jingai khublei halor kane ka jingwan jurip dalade jong u Myntri bad la lap dala ki jong ki khmat ïa ka jinglong jingman, ula ong ruh kane ka Amphitheatre kaba don ha Jowai ‘ka dei ka spah kaba rieh’ bad u kyrmen ha kine ki sngi ban wan kan sa treikam noh shen.
Da kaba kyntu ïa u myntri ba un shim khai ïa kane khnang ba ki samla kin ïoh ban ïakmen ïarisa lyngba ki prokram bapher bapher ban pynlong ha kane ka ‘Amphitheatre’ kaba ñiar em ban don kum kiba ki jaka hapoh ka jylla.
Ha ka juh ka por u kyntu na u Myntri ba un pynurlong lem ïa ki jingdawa naduh ka District Library cum Auditorium ha Jowai bad ban wanrah sa kawei ka District Library cum Auditorium Halls na ka bynta ka East Jaiñtia Hills District.
