Pynhap pyrda ka Syiem Jingsuk Parish, ïa ka ‘1st Inter RC Schools Cultural Competition’

0

Jowai, Jylliew 14: Ka Syiem Jingsuk Parish, Amlarem kala pynlong ïa ka ‘1st Inter RC Schools Cultural Competition, 2022’ ha kane ka 8 tarik bad 10 tarik u bnai Jylliew, 2022 ha kane ka jingïakop pynisap-pyniphong la wan ban ïashim bynta kumba 8 tylli ki skul hapoh ka Parish. Shibun tylli ki jait jingïakop la pynlong ha kitei ki sngi kum ka Quiz, Debate, Extempore speech, Singing, Dancing, Fancy Dress bad Mimicry.
Ka jingthmu jong ka jingpynlong ïa kane ka jingïakop ka long ban pynneh pynsah ïa ka kolshor jong ki longshuwa manshuwa bad ban ai jinghikai ïa ki khynnah skul ban burom ïa ka bad ban pyndonkam hok ïa ki sap ki phong kiba u Blei ula ai ha manla u ne ka briew.
La pdiang sngewbha ïa baroh da u Rev. Fr. Genes Shangpliang, u Parish Priest bad u General Secretary jong baroh ki RC Schools hapoh Ka Syiem Jingsuk Parish Amlarem. U kongsan ha ka jingplie pyrda ïa katei ka jingïakop u bah Kampher Pohlong uba long u Rangbah shnong jong ka Amlarem Centre u la ong ba “Ngi dei ban pynneh pynsah bad pynbha ïa ka kolshor jong ka jaitbynriew jong ngi da kaba ngi buh ïa ka hapoh ka dohnud, ha ka jingmut jingpyrkhat bad pyndonkam ïa ka ha ka jingim jong ngi.”
U kongsan synrop u Bah Patrick Lamare uba long u Range Officer, Soil and Water Conservation hapoh Amlarem Sub-division u la ong ba “Nga dap da ka jingsngewkmen ban ïohi ba ka Parish ka pynïaid kum kine ki program ha kane ka juk mobile namar ba da kine ki program ka la pynlong ïa ki khynnah ban mih noh na ki kamra peit mobile ha kaba kila shahteh shahkhum ïalade kum ki syiar pham.
U la kyntu ruh ba kum kine ki creative program dei ban pynlong kham bunsien namarba ki ïarap ïa ki khynnah skul bad ïa ka jingroi jingpar jong ka imlang sahlang.”
Ha ka 10 tarik u Jylliew, 2022 ka kylla miet jong kane ka jingiakop u Bah Lahkmen Rymbui, Minister of Education, Home Affairs, Border Area Development jong ka sorkar jylla Meghalaya bad uba long ruh u Local MLA jong ka Amlarem Constituency ula long u kongsan ha ka closing ceremony.
Ha shuwa ka closing ceremony u Minister u la plie ïa ka ïingsah jong ki nonghikai ha kaba ma u hi ula ai jingïarap da ki tin baskhem ban pyndep ïa ka jingtei ïa katei ka ïing. U la pynpaw ïa ka jingsngewkmen jong u ban ïohi ïa ka standard educative program ha kitei ki ar sngi.
U la pynpaw ia ka jingsngewkmen kaba khraw kum u minister jong ka tnat pule puthi jong ka jylla ba ki khynnah klas X bad klas XII na Ka Syiem Jingsuk Higher Secondary School bad kiwei de ki skul ha kane ka thaiñ ki la lehbha ha ki board exam, 2022 ba dang shu pynbna shen mynta ka sngi.
Ula ai ka jingïaroh ïa baroh ki khynnah skul kiba la pass bha bad ula ai khublei ruh ïa ki Phadar, ki Sistar, ki nonghikai kiba la ai jinghikai bad kyntu kynpham ïa ki ban lehbha. U la kyntu kynpham ïa ki khynnah skul kumne “Ka jingpass ïa ka klas X bad Klas XII kam long ka jingkut jong ka jingïaleh exam, hynrei ka dei tang ka jingsdang ïa kiwei pat ki jingïaleh exam ki babun ki ban dang wan ha ka jingim jong ki.
Ula ong namar kata to long borabor kiba trei shitom, namar ba dei lyngba ka jingtrei shitom phin sa ïoh kheit ïa u soh ka jingjop.” U kongsan synrop ha kane ka closing ceremony u Bah Bester Salahe uba long u Advocate u la ïaroh ïa ka parish kaba la pynlong ïa kum kane ka competition. Ula ong ba “kane ka program ka long kaba ai jinghikai bha ïa baroh khamtam eh ïa ki khynnah pule. Lada long ka ba lah dei ban pynlong ïa ka manla u snem.” Kum u advocate ula pashat jingmut ruh shaphang ka jingdonkam ïa ka aiñ ha ka jingim jong ngi.
U la kyntu kynpham ruh ba dei ban bud ryntih bha ïa ka khnang ban ïoh ïa ka jingim kaba kmen bad kaba jop.
Ha kane ka sngi pynkut u kongsan ula sam ïa ki khusnam sha ki nongjop bad ki skul ha katei ka sngi. Ïa ka nam Best School Award for UP & Sec. Schools la ïoh rah da ka St. Francis De Sales Secondary School, Bakur-Dawki, katba ïa Ka Best School Award for LP Schools la ïoh rah da Ka Syiem Jingsuk Higher Secondary School, Amlarem.

Leave A Reply

Your email address will not be published.