Shillong, Lber 03: Ha kawei naki jingïalehkai kaba itynnat jong ka lympung I-League mynta ka samoi ha Corporation Stadium, Kerela, ka Shillong Lajong ka la ïoh ban khur pura ïa ki lai point da kaba pynliem ïa ka Gokulam Kerala da 4-3 kol, ha kaba ka kol pynjop ka la wan ha ki minit pynjlan jong ka por.
Da kane ka namjop ka Lajong ka la kiew lai kyrdan ryngkat ki 26 point sha ka kyrdan ba saw ha ka miej, da kaba sahdien 5 point hadien ka Churchill Brothers bad ka Inter Kashi kiba wan kyrdan ba nyngkong bad ba ar. Katba ka Gokulam ka la hiar sha ka kyrdan ba hynriew bad dang ïaineh da 25 point.
Ha ka por ba ka Lajong ka la duh jingkyrmen ban khur pura ïa ki lai point hadien ba u Mashoor Shereef u la pynïakhaid da mar 3-3 na bynta ka Gokulam, bad la i kumba kan hap ban hun tang ïa ka 1 poin na kane ka jingïalehkai, u Renan Paulino u la thep jlang ïa ka free-kick ha ki minit pynjlan jong ka por ban pynthikna ïa ka jingjop na bynta ka Lajong.
Kiba la pynkhihjar na bynta ka Gokulam ki long u Thabiso Brown (9 & 54’minit) uba la thep ar kol bad u Mashoor Shereef (88’minit), katba ki saw na bynta ka Shillong Lajong la thep da u Phrangki Buam (14 & 50’ minit) ar kol, u Marcos Silva (85’minit) bad u Renan Paulino 90+6 minit).
