Nongstoiñ, Rymphang 19: Ka Executive Committee jong ka shnong Mawmarin Maweit WKH, ha ka jingïalang kaba la shong dang shen ka la sngewkhia halor ka jingdon ki Political Party kiba leh shongshit palat, haduh ban pyllait lut ïa ki jingsawa ha ki kali jong ki, kum shi bynta jong kata ka jingïalap elekshon bad ban ïaid kylleng sawdong ka shnong. Nalor kiwei ruh ki jingleh shongshit ki bym I ïahap satia.
Kitei ki rukom leh ki la ktah ïa ki paidbah nongshong shnong khamtam ki khunlung khynnah bad kiba shitom ha ka met. Ka jingleh ka pyni ba ki leh mon bad wanrah ïa ka noise pollution khlem don jingkheiñ snep ïa ki nongkyndong.
Na ka liang ka EC ka la shim ruh ïa ki rai kum ki kyndon jingmaham ïa ki political party ha kine ki sngi haduh ka sngi thep vote. Kine ki kyndon ki long ban kyntu sha baroh ba kim dei ban pynsawa palat ïa ki jingtem. Ka jingdih kyiad pathar bad khamtam eh ka jingleit ruh ïing briew mynmiet shwa ka sngi thep vote, ban leh myn leh kum kiba leit ai sngewbha da kino kino ki tiar ne pisa, um ka jingpyrshang pynbiej.
Ka shnong ka maham ïa kino kino kiba ïaleh pyrshah kin hap ha ka jingbishar jong ka dorbar shnong. Kine ki jingmaham ki long ruh katkum ki aiñ jong ka tnad Election, ong ka kyrwoh na u sordar shnong Mawmarin Bah B. Lyngdoh.
