Shillong, Rymphang, 19: Ka Employment Monitoring Cell jong ka Khasi Students Union (KSU) ha ka sngi Balang ka la leit ban ïakynduh ïa ka Director General of Police (DGP) ka Kong Idashisha Nongrang ban ïakren halor ka Office Memorandum ba lah pynmih da ka tnad Home (Police) ba yn shah thoh eksamin tang ïa katto katne ngut, kata ha ka Ratio 1:20 (20 ngut na bynta kawei ka kam kaba lait) na kiba la pas ïa ka jingmareh ne Physical Efficiency Test (PET).
Ki nongïalam ka KSU ki la kyrpad ïa ka DGP ba dei ban ailad ïa baroh ba kin thoh ïa ka eksamin hadien ba ki la lah ne shah jied ha ka jingmareh ne Physical Efficiency Test kumba la ki long ha ki snem ba ladep bad ym ban shuh jied katkum ka Ratio 1:20.
Ka seng ka kyrpad ïa kane halor ka nongrim na bynta ki kam bapher bapher hapoh ka tnat Pulit ba ym lah ban shu jied tang ïa kiba la wan sha khmat ha ki jingmareh khlem da ailad ne peit ïa ka jingnang jingstad da kaba ailad ban thoh eksamin khnang ban ïoh ïa ki briew kiba tbit dei ban peit ha manla ki bynta bad lada ym ailad ba kin thoh ïa ki eksamin kan long leh nohei.
Ka Seng ka la ban ruh ba ha ka jylla ki samla wad kam wad jam ki la nang bun bad ki kam Sorkar kiba lait ki long kiba duna bad lada ïaid katkum kane ka Office Memorandum kaba mut kin don ki samla ki bym ïoh ban thoh ïa ki eksamin watla ki la shah jied ha ki jingmareh ne PET. Kane kan pynduh mynsiem ïa bun ngut ki samla wad kam ha ka jylla.
Haba jubab ïa kane ka jingtyrwa jong ka KSU ka DGP ka la pynpaw ba ka sngewïahap ïa kane ka bynta bad ong ruh ba ka ladon ka jingïakren ban pynkylla ïa kane Office Memorandum hynrei ka rai kaba khatduh kan dei hi na ka Sorkar.
Ka seng ka la pyntip ruh ba ka ophis jong ka DGP ka dang ap ruh ban ïoh ïa ki jinglum jingtip na baroh kiba la shah jied ne pass ïa ka jingmareh (PET) bad lada don kiba la pas kiba ym ïoh ban thoh eksamin.
Ka DGP ka la kular ba kan sa pyrshang ban ailad ïa baroh kiba la pas ha ka jingmareh (PET) ba kin ïohlad ban thoh ïa ki eksamin.
