Shillong, Rymphang 19: U Myntri Rangbah ka Jylla Conrad K Sangma mynta ka sngi Balang, u la plie paidbah ïa ka Apollo Trinity Medical Centre ha nongbah Shillong bad u la ong ba kane ka centre kan long ka jingkyrkhu ïa ki nong Meghalaya.
ïa kane ka jingplie la sakhi lang da ka Myntri ka tnat ka koit ka khiah, ka Dr M Ampareen Lyngdoh, u Chief Secretary (CS) ka Jylla u Bah DP Wahlang bad u Regional CEO East jong ka Apollo Hospitals Enterprise Limited u Rana Dasgupta.
ïa kane ka Health Center la plie haka jingïatreilang bad ka Apollo Hospitals Enterprise Limited.
Haba kren ha kane ka sngi u Myntri Rangbah ka Jylla, u Conrad K Sangma u la pynpaw ïa ka jingsngew sarong kaba khraw ban sakhi ïa ka jingpyndep ïa ka Apollo Trinity Medical Centre.
U Conrad u la ban jur ïa ka jingangnud jong ka Sorkar Jylla ban pynjanai ïa ki jingshakri ha ka koit ka khiah, da kaba pynpaw ba ka Meghalaya ka pynlut haduh 9% na ka mang tyngka ha ka tnad koit ka khiah bad ka dei ruh ka bhah kaba heh tam ha ka Ri.
U la kubur ïa ka jingdonkam ban ïoh ïa ki jingshakri kiba kham bha ban wad bniah ïa ki jingpang bad pynpaw ïa ka jingkyrmen ba kane ka jaka thymmai kan ïarap ban pynduna ïa ka jinglut jingsep ki nongshong shnong kiba ju leit shabar jong ka Jylla ban leh ïa ki test jingpang bad ban shah sumar.
“Ka tnat ka koit ka khiah ka la long kaba kongsan tam na ka bynta ka Sorkar jong ngi. Naduh ka koit ka khiah ha ki thaiñ nongkyndong haduh ki jingtei ha ka liang ka koit ka khiah, ngi la kiew bha. Kane ka jaka kan pyndap ïa kiba bun ki jingduna ha ka rukom sumar jong ngi bad kan wanrah ïa ka jingsumar kaba bha sha ki paidbah” la ong u Conrad.
U Conrad u la kren ruh shaphang ki jingthmu ban pynbha ïa ka koit ka khiah ha ka Jylla, kum ka jingpynrung kam ïa ki 500 ngut ki doktor, ka jingpyndonkam daki bor Solar haki sub-center bad ka jingpynlong digital ïa ki kot ki sla jong ki nongpang.
U la ban jur ïa ka jingdonkam ban wad bniah bha ïa ki jingpang bad ban sumar ïa ki nongpang, da kaba kyntu ïa ki nongtrei ka koit ka khiah ha katei ka jaka sumar ban pynthikna ïa ka jingshakri kaba don ka jingsngewrit.
Ha ka jingkren ka myntri ka tnat ka koit ka khiah, ka Dr Ampareen Lyngdoh kala ban jur ïa ka jingdonkam jong kane ka jaka sumar, da kaba kdew ba ka jinglut ka long kaba heh ha ba leit shabar ka Jylla bad ka jingkit kaba khia ha ka liang ka pisa tyngka na ka bynta kiba bun ki longïing.
Ka la pynpaw ba kane ka jaka kan ai jingkyrmen ïa kito kiba donkam jingïarap, da kaba pynthikna ba ka jingsumar pang kaba bha kan don hapoh ka Meghalaya hi.
Ka Apollo Trinity Medical Centre ka dei kaba la pyndap da ki lad jingsumar ba kham tbit kynthup ka diagnostic services, kynthup ka ECG, TMT, echocardiography, pulmonary function tests (PFT), ultrasound, X-ray, dental care, ophthalmology, physiotherapy, integrated lab kaba treikam lang bad ka Apollo Diagnostics.
Ka tnad Radiology ka don ka jingïasoh bad ka Apollo TeleRadiology International, kaba pynthikna ïa ka jingïasyllok bad ki kaiphod jong ki riew shemphang.
Ha ka bynta kaba ar jong ka jingpynheh, yn pynrung ïa ki jingshakri jong ka jingsumar kum ka dialysis, endoscopy, CT scans, bad MRI.
Yn pynmih ruh ïaka App ba kyrpang na ka bynta ki nongpang ban buh por kynduh ne Appointment Bookings, Home Sample Collections.
Kane Center kan don ruh ka jingïasyllok lane ka Telemedicine Consultations bad ki stad ka Apollo na Chennai, Hyderabad, Delhi, Kolkata, bad Guwahati.
