Khliehriat, Rymphang, 18: Ka Dorbar Shnong Wapungskur, East Jaiñtia Hills District, lyngba u Waheh Shnong ka la pynbna paidbah ba ka shnong ka la khang pyrshah ïa baroh ki seng saiñpyrthei bad ïa baroh ki kyrtong kiba ïakhun elekshon ban pynheh sur jingrwai elekshon hapoh u pud u sam jong ka shnong palat ïa ka 8:00 baje mynmiet kata haduh ban da kut ka elekshon MDC.
U kyrwoh ba la phah da u Waheh Shnong Wapungskur Bah P.Dkhar u la ong, kane ka jingkhang pyrshah da ka shnong ban pynheh sur jingrwai ka long ban ym wanrah jingthut ïa ki khynnah skul kiba dang don hapdeng ka jingpynkhreh ïa ki eksamin jong ki.
La pynshai shuh shuh ba kane ka kyndon ne ka jingkhang pyrshah da ka shnong ban pynheh sur jingrwai kan nym treikam ha ka por ba ki kyrtong ki pynlong ïa ki jingïalang ïalap elekshon hapoh shnong kaba aibor da ka shnong.
