Jied ïa u briew uba la ih ha ka imlang sahlang, kyntu u Bah Lahkmen ïa ki paid ka Tamu

Jowai, Rymphang 18: U MLA jong ka UDP Bah Lakmen Rymbui ha ka sngi Baar u la hiar sha ka shnong Tamu, West Jaiñtia Hills ban synran lang ïa u Bah Damian S. War u kyrtong jong ka UDP na Mynsngat Khanduli Constituency ryngkat ka jingdonlang jong u MDC ka thaiñ Bah Dawan Lyngdoh bad ki rangbah jong ka party.
Ha kane ka sngi ki paidbah nongkyrshan jong u Bah Damian S War ki la ïamih da ki spah ngut ha shnong Tamu ban pyni ïa ka mynsiem jingïatylli ban pynjop donburom ïa u na kane ka thaiñ.
U Bah Rymbui haba ai jingkren ula kyntu ïa ki paidbah ka thaiñ ban jied ïa u briew uba lah ih ha ka kam imlang sahlang bad ruh uba don ka nongrim ban shakri ïa ka shnong ka thaw kumba long u Bah Damian War.
U la pan ka jingkyrshan ba pura ïa u kyrtong ka party u Damian War ïa uba ka party ka la pdiang sngewbha hadien ka jingïasyllok bad u MDC ka thaiñ u Bah Dawan Lyngdoh bad u la ïohi ruh ba ki paidbah ka thaiñ ki la angnud ban jied ïa u Bah Damian S. War kum u kyrtong ban ïakhun ïa kane ka Election sha JHADC.