Pdiang sngewbha u Lat ka jylla ïa u Sadguru Sri Madhusudan Sai

0

Shillong, Rymphang 16: U Lat ka jylla Meghalaya, u CH Vijayashankar, ula pdiang sngewbha ïa u Sadguru Sri Madhusudan Sai, u nongïalam niam bad uba leh ïa ki kam synei ïa ki briew uba la pawnam ha kylleng satlak ka pyrthei ha ka jingwan ha Raj Bhavan, Shillong hynne ka sngi u Blei. Ha kane ka jingïakynduh u Lat ka jylla ula pynpaw ïa ka jingsngewnguh ïa u Sadguru Sri Madhusudan Sai halor ka jingnoh synniang kaba khraw ka jong u sha ka imlang sahlang khamtam eh ha ka liang ka pule puthi, ka koit ka khiah bad halor ka bam kaba tei, kaba la kyntiew ïa ki mynsiem briew ha kylleng jong ka ri India.
Ha kaba ïadei bad kane u Lat ula pynpaw ruh ïa ka jingsngewtynnad halor ka jingïatreilang hapdeng u Sadguru bad ka sorkar Assam ban sdang ïa ka Morning Nutrition Programme, ban sam ei ïa ki jingbam kiba tei sha ki khynnah kiba leit skul. Kane ka jingthmu ka la ai jingmyntoi ïa ki lak ngut kaba pyni ruh ïa ka jingskhem jingmut ha kaban noh synniang na ka bynta ka bha ka miat jong ki paidbah.Haba ai jingkren, u Sadguru Sri Madhusudan Sai ula banjur ïa ka jingkongsan jong ka “Vasudhaiva Kutumbakam”, kawei ka pyrthei, kawei ka longing, bad ula kyntu ïa baroh ba kidei ban don ïa ka mynsiem ban shakri bad ba don ïa ka jingsngewlem.
Ki jinghikai bad ki kam leh bha ki jong u ki la bteng ha ka ban ai mynsiem ïa ki riewshimet kiba trei na ka bynta ka bha ka miat jong ka imlang sahlang.U Sadguru u la ïakynduh ruh ïa u Vijay Kumar Mantri u Commissioner and Secretary ka tnad pule puthi ha kaba ki la ïakren ban sdang noh ïa ka jingsam ei ïa ki jingbam kiba tei ïa kumba 10,000 ngut ki khynnah skul ha ka jylla Meghalaya.La ong ba u Sadguru u la ïaroh ruh ïa ka jylla Meghalaya ïa ka jingitynnad ïa ki jaka bad ka mariang ka jong ka bad ka jingdon ïa ki kynbat bad u don ïa ka jingthmu ban noh synniang ha kaba ïadei bad ka liang jong ka koit ka khiah ruh.Ha kane ka sngi la pynlong ruh ïa ka prokram kaba ïadei bad ka kolshor ha Raj Bhavan, ïa kaba la pynbyrngia da ka Geetanjali Dance Academy. U Lat ka jylla ula pynpaw ïa ka jingsngewnguh ïa u Sadguru Sri Madhusudan Sai halor ka jingnoh synniang kaba khraw ka jong u bad kumjuh ïa ka jingwan jngoh ïa ka jylla Meghalaya, ka ban long kaei kaei ka ban ïai sah kynmaw ha ka liang ka niam bad ka jingai mynsiem ban trei na ka bynta ka imlang sahlang bad kumjuh ruh na ka bynta ka bha ka miat ki paidbah nongshong shnong.

Leave A Reply

Your email address will not be published.