Shillong, Rymphang 17: Ka Metallica CC ka la pynliem da 2 wiket ïa ka Khalsa Warriors ha kawei na ki jingïalehkai jong ka Shillong Cricket League First Division 2024-25 ba la pynlong da ka Shillong Cricket Association (SCA) ha madan Polo, Shillong, ha ka sngi Nyngkong (17 tarik Rymphang).
Hadien ba jop ïa ka toss ka Khalsa Warriors ka la shimti ïa ka pali tied ba nyngkong bad ka la lah ban kamai 139 ron shuwa ban khyllem baroh 10 wiket naki 36.1 ober. U Jitu Gogoi (35 ron naki 74 bol) bad u Karan Jaiswal (18 ron naki 27 bol) ki dei kiba kham paw ha ka tied na ka liang jong ka Khalsa Warriors.
Haba phai pat sha ki rangkawang bol jong ka Metallica u Ashish Gurung (7 over: shah tied 26 ron) bad u Sidddharth Das (6.1 over: shah tied 17 ron) ki la ïoh ban khur mar 3 wiket.
Watla na ka liang jong u Sawan Singh (khur 4/24 naki 8 ober) bad u Rahul Singh (khur 1/24 naki 8 ober) ki la lehkai bha ha ka bowling hynrei kim shym la lah satia ban khanglad ïa ka Metallica ban poi sha ka thong, ha kaba ka la pyndep ban kynjoh ïa ka 140 ron ba ka donkam hadien 38.3 ober, da kaba khyllem 8 ngut ki nongtied.
U Dipayan Nandi u la kamai 37 ron naki 56 bol, katba u Nikhil Thapa u la ïarap 34 ron naki 50 bol kaba la pynthikna ïa ka Metallica ban khur ïa ka jingjop da 2 wiket. Ha kaba kut ïa ka nam Man of the Match la khur da u Ashish Gurung (uba la kamai 14 ron ha ka tied bad khur 3 wiket ha ka bol).
