Rambrai, Rymphang 16: Ka elekshon ka nang hajan na ka bynta ka KHADC bad JHADC, ha kaba ki party bad kyrtong shimet ki la pynkhreh shait shait ïalade. Ha Rambrai Constituency ki kyrtong ki la pynkhreh bha shwa ka elekshon ka ban long ha ka 21 tarik.
Shwa kane ka sngi thep vote, kine ki kyrtong ki la mih hakhmat ki paidbah ha ka sngi saitjaiñ hakhmat ïew Rambrai, na ka bynta ban pynshai ïa ki nongrim jong ki hakhmat ki paidbah ka Rambrai Constituency.
Ki kyrtong ki kynthup naduh u Bah Dominic Wahlang na ka BJP, Bah K.P Pangniang na ka HSPDP, Bah Kimfa Marbaniang na ka NPP, u Bah Lurshai Kharbani kyrtong shimet. Kine ki kyrtong ki la pynpaw ïa ki nia ki jutang ha ka rynsan ïalap elekshon kaba la long hakhmat ïew Rambrai. U kyrtong ba la pep ha kane ka jingïalang dei u Bah Bormanding Nonglang kyrtong ka Congress. Ha ka jaka jong u la don da u Bah J.T.S Thongni MDC barim ka Rambrai.
Na ka liang ka BJP ka la ïeng rynsan nyngkong ha kaba u bah Dmikstar Lyngdoh, u la ong ba ka BJP ka dei ka party kaba ïalam ïa ka sorkar ha Delhi ha ki snem ba la dep bad haduh ka samoi treikam kaba mynta. Ha ka jingsngew jong u katei ka party kaba la lam khmat da u Narendra Modi kum u Myntri Rangbah duh jong ka ri, ka don ïa ki mat treikam kiba sngew tynnad bad kiba ïahap bha bad ka jingangnud jong ki paitbah ka jylla khatam eh ha kaba ïadei bad ka jingïada ba kyrpang ïa ki jaitbynriew riew lum.
Nalorkata u bah Dominik Wahlang u ba dei u kyrtong na katei ka constituency, u la ong ba kum uwei na ki nongshong shnong jong ka thaiñ Langpih, u don ka jingsngewkhia kaba jur halor ki jingeh ba ki paitbah kiba shong ha katei ka thaiñ ki ïakynduh na ka por sha ka por namar ka jingleh don bor jong ka sorkar Assam.
U la ong ruh ba kiwei pat ki seng saiñ pyrthei ki la kular na ka por sha ka por ban pynbeit noh ïa u pud u sam, hynrei haduh kine ki sngi kim shym la lah ban pynurlong. U la pynkynmaw ruh ba dei ha kine ki snem ba la dep ba ka BJP ka la ïoh ban bat ïa ka sorkar ha Assam ba da ka jingïa sngewthuh jingmut bad ka sorkar Meghalaya, ki la lah ban pynbeit ïa ki katto katne ki jaka kiba don hapdeng ka jingïa kajia. U don ka jingkyrmen ba lada ka BJP kan dang synshar biang ha Assam hadien katto katne por kin sa lah ban pynbeit noh ïa u pud u sam.
Hadien ka BJP la ieng rynsan sa ka HSPDP, ha kaba u Bah K.P Pangnïang u kyrtong MDC na katei ka constituency bad u samla Pynshai Joel Dkhar secretary ka HSPDP jong ka Youth Wing central body, ki la ai ka jingpynshai sha ki paitbah halor ki mat treikam jong ka party bad ka thong ba ka party ka don ban trei na ka bynta jong ka jaitbynrïew.
Ha kajuh ka por la ïoh ruh ïa ka jingpynshai na u bah D.N.Marak na Malangkona, uwei na ki nongïalam ba hakhmat jong u bah R.G Momin ha ka Election MLA ha u snem 2023. Hynrei, ha kane ka kynti ma u bad bun ngut kiwei pat ki nongïalam na katei ka thaiñ, kiba la kyrshan bor bah ïa u bah R.G.Momin, ki la wan ban pynïasoh sha ka HSPDP bad ban ai ka jingkyrshan ba pura ïa u kyrtong jong ka party ha kane ka elekshon MDC.
U Bah K.P Pangniang u la ong ba ka HSPDP ka don ïa ka thong ban pynkhlaiñ shuh shuh ïa ka 6th Schedule, namar kumba long mynta ka don hapdeng ka jingpang ba la pynjot ïa ka iktiar jong ka da ka sorkar India.
U la ong, “Naduh ba la ïoh ïa ka Jylla bad ka District Council, ki aiñ ka sorkar India ki la khñiot ïa ki trai muluk trai jaka. La shah khang shah mana lut ha man la ki jait kam. Ngi la shu long tang ki nongsumar mynta namar ka jingduh noh jong ka bor ha District Council. Ka jingdon ka ka aiñ 12 A ka la ktah ba ngim lah shuh ban die laitluid trei laitluid. Namarkata ka HSPDP kan ieng skhem ha ka nongrim u Maieit Hoping ban ïakhun bad ban ïada ïa ka ri bad ka Jaidbynriew”.
U Bah J.T.S Thongni u la ong ba ka seng Congress kan ïaleh ban pynneh pynsah ïa ki hok jong ki paidbah ha ka Jylla. U la ong ba ka Congress ka la ïaksaid ban shakri ïa ka ri bad jaidbynriew da ki phew phew snem.
Ym tang katta ka seng Congress Rambrai ka la shaniah ruh ïa u Bah Kimfa Marbaniang kum u MLA, hynrei ka jingkylla jong u sha ka NPP ka long ka bym lah pdiang ha ki paidbah Rambrai.
U la ong ba ki paidbah Rambrai ki kwah jingkylla ha ka bha ka miat, ka roi ka par ym ïa ka jingkylla marwei jong u sha ka NPP. Ki paidbah ki sah lyngngoh ba hato ka dei ka rai aiu kaba kum kane. Nalor nangta u la ong ba u bah Bajop Pyngrope u la long MDC la 6 snem, hynrei kine ki la leh aiu na ka bynta ki paidbah. Mynta lei jah syndon jlang shano ym tip.
U Bah Kimfa Marbaniang u la ong ba kam long kaba suk ïano ïano ban ïakhun ïa ka elekshon na ka por sha ka por. La hap ieh lut ïa ka ïing ka sem bad tur na ka bynta ki paidbah.
Ha u snem 2013 nga la dep kular ba nga wan ban shakri ïa ki paidbah bad ban wanrah ïa ka jingkylla, mynta ruh ngi don ha kajuh ka nongrim. Kiwei ki seng ki bun satang ki jingkynthoh ba bun jait pyrshah ïa nga bad ka party NPP, hynrei phi ki paidbah phi ïohi hi haduh katno kane ka party ka la leh bha ïa ka dong ka thaiñ bad ka Constituency.
U la ther tyngeh khamtam ïa ka seng VPP da kaba ong ba ka dei tang ka seng pynthame pynshongshit briew. Hynrei na baroh ki seng dei tang ka seng NPP kaba trei bad leh bha na ka bynta ka ri bad ka jaidbynriew.
U Bah Lurshai Kharbani kyrtong shimet, u la kyntu ïa ki paitbah ba shuwa ba kin leit ban thep ïa ka vote jong ki, ki dei ban da pyrkhat janai ym ban shu thep da ka jingshongshit lane da ka jingsngew briew. Namar ka shi vote jong uwei pa iwei ka dei ka hok jong ki bad lada ki bakla ban jied ïa ki nongmihkhmat, kan poi ka por ba kin sa ïakynduh shibun ki jingeh ym tang hapoh ka constituency hynrei ha ka jylla hi baroh kawei.
