Nongpoh, Rymphang, 15: Kum ka jingïaid bteng ban ïa khun pyrshah ne pynduhjaid ïa ki kam khaïi drok beiñ ha Ri Bhoi District, ki Pulit ka Ri Bhoi ha ka janmiet jong ka sngi Palei kata ha ka por 6 baje ei ei ki la ïoh bat ïa ki 5 ngut ki briew kiba pyndonkam da ka Auto Rickshaw ha kaba khaïi drok beiñ ha ka thaiñ Nongpoh.Ha ka jingïoh jingtip bad suba ba ki don kiba don kti ha ka kam khaïi drok, ki Pulit ka Ri Bhoi ki la pynap shrip bad ki la ïoh ban bat haduh 5 ngut ki briew kiba pyndonkam da ka Auto Rickshaw, ba la suba ba ki don bynta ha ka kam khaïi drok.
Haba kren sha ki lad pathai khubor, u Additional Superintendent of Police ka Ri Bhoi, u Bah Jason Mairom, u la ong ba katei ka jingleit khynra ïa kitei ki kali Auto Rickshaw, ka dei hadien ba la ïoh jjingtip kaba bniah ba ki don ki briew kiba thmu ban khaiïi drok beiñ bad lyngba ka jingpynap shrip ki Pulit ki la ïoh ban bat ïa kitei ki 5 ngut kiba la suba ba ki don bynta ha ka kam khaïi drok.U la ïathuh ruh ha ka jingpynap shrip la ïoh ban bat ïa kitei ki 5 ngut bad la ïoh ruh ban kurup ïa u thyrnia injek ba ki pyndonkam ha kaba dih drok bad lyngba kitei ki dak ki shin la tip shai ba ki dei kiba don bynta ha kane ka kam khaïi ne ïa dih drok.
U la ong ruh ïa kitei ki 5 ngut la rah sha Thanad ha Nongpoh ban pynlong ïa ka jingtohkit bad ruh ban ai ïa ka jingsneng jingkraw (Counselling) da kaba pyntip sha kiba haïing hasem jong ki, namar katkum ka jingtohkit ne lap la tip shai ba ki don bynta ha ka kam dih drok ne khaïi drok.
“Ki Pulit ka Ri Bhoi ki kloi ban ai jingïarap ïa kito kiba kwah kylla na ka jingkyrni ha u drok da kaba kin leit sha ka One Stop centre ne sha ki Rehabilitation Centre, hynrei ban bteng ïa ki kam khaïi beaiñ ïa u drok kin nym don jaka, namar ki Pulit ki phai khmat bha ban pyrkhing ïa kine ki ka khaïi drok beaiñ” ong u Bah Mairom.U la bynrap ruh ba ka tnad Pulit na Ri Bhoi kan dang bteng ban ïakhun pyrshah ne ban pynduhjaid ïa ki kam khaïi drok, ba u drok u la pynjot ïa bun ki khun samla bad kloi ruh ban ai jingïarap ïa kiba kwah ban kylla, hynrei ki Pulit kin nym map satia lada lap ïa kito kiba don kti ha kane ka kam khaïi drok beaiñ ba ka jingïakhun pyrshah ban pynduhjaid ïa u drok kan dang ïaid bteng beit nangne shakhmat, u la bynrap.
